Një studim i publikuar së fundmi në Nature Communications tregon se prejardhja gjenetike dhe stili i jetesës së prindërve, përfshirë pirjen e duhanit, mund të ndikojnë në shfaqjen e ndryshimeve të reja gjenetike te fëmijët.
Hulumtimi, i realizuar nga Wellcome Sanger Institute dhe Universiteti i Kembrixhit, analizoi të dhënat gjenetike të 10 mijë tresheve prind-fëmijë, dhe evidentoi se mutacionet e reja (DNMs), të cilat ndodhin në vezë apo spermë dhe trashëgohen te pasardhësit, ndërlidhen ngushtë me moshën e prindërve, sidomos të babait. Çdo vit shtesë në moshën e babait sjell rreth 1.5 mutacione më shumë.
Studimi vë në pah edhe dallime të vogla mes grupeve të ndryshme etnike, ku fëmijët me prejardhje afrikane kishin pak më shumë mutacione se ata me prejardhje evropiane apo aziatike. Po ashtu, është vërtetuar një lidhje mes pirjes së duhanit nga prindërit dhe rritjes së lehtë të numrit të mutacioneve te fëmijët, me një mesatare prej rreth 2% më shumë.
Sipas studiuesve, këto ndikime janë të vogla, por të rëndësishme për të kuptuar më mirë faktorët që formësojnë gjenetikën njerëzore dhe që mund të kontribuojnë në sëmundje të rralla. Gjetjet pritet të kenë ndikim në studimet e ardhshme në gjenetikë mjekësore dhe popullatash./Gazeta Shneta/