Kompania e lodrave Mattel ka lansuar Barbie-n e parë që përfaqëson autizmin, duke zgjeruar linjën e saj të përfshirjes Barbie Fashionistas.
Kukulla është krijuar në bashkëpunim me organizatën Autistic Self Advocacy Network (ASAN) dhe synon të reflektojë përvojat e fëmijëve në spektrin e autizmit, duke ofruar një model lojërash që edukon dhe fuqizon njëkohësisht, shkruan The Guardian, transmeton Gazeta Shneta.
Barbie-ja e re ka veçori të dizajnuara me kujdes për të pasqyruar disa nga mënyrat unike të përpunimit të botës nga individët autikë. Ajo mban kufje që reduktojnë zhurmën për të ndihmuar në mbingarkesën shqisore, ka një fidget spinner funksional në njërën dorë dhe kyçet e saj janë të lëvizshme për të lejuar lëvizje që ndihmojnë në qetësim dhe rregullim ndijor.
Kukulla vjen gjithashtu me një tabletë komunikimi, që imiton mjetet që përdorin disa fëmijë për të komunikuar, dhe veshje të rehatshme për të respektuar ndjeshmëritë shqisore.
Ky lançim është pjesë e një përpjekjeje më të gjerë të Mattel për të promovuar diversitetin dhe përfaqësimin në lodra. Seria Fashionistas ka përfshirë më parë kukulla me sindromën e Down, me diabet tip 1, me gjymtyrë prothetike apo me mjete ndihmëse për dëgjim, duke krijuar modele që pasqyrojnë botën reale dhe realitetin e fëmijëve me aftësi të ndryshme.
Komunitetet autike dhe ekspertët e advokimit e kanë mirëpritur këtë nismë, duke e parë atë si një hap të rëndësishëm për normalizimin e neurodiversitetit dhe rritjen e ndërgjegjësimit.
Barbie-ja e re jo vetëm që ofron lojë dhe argëtim, por gjithashtu edukon fëmijët mbi përfshirjen dhe respektimin e ndryshimeve individuale, duke krijuar një mesazh pozitiv për gjeneratat e ardhshme. /Gazeta Shneta/