Secili person që shmang kontrollin doganor dhe bart mallra duke kaluar vijën kufitare, kryen vepër penale e cila sipas Kodit Penal të Republikës së Kosovës, është e dënueshme me gjobë ose burgim deri në 3 vjet. E raste të tilla zbulohen shpesh në vendin tonë, raporton Gazeta Sinjali.
Sinjali mëson se Njësia për Hetimin e Krimeve Ekonomike dhe Korrupsion bashkë me Inspektoratin Farmaceutik kanë kryer dje kontroll në barnatoren ‘Aqua Pharm’ në Prizren, ku kanë gjetur një sasi të konsiderueshme të barnave pa banderola.
Pronarja e barnatores nuk ka ofruar dëshmi për origjinën e barnave dhe si rrjedhojë të njëjtat janë sekuestruar nga Inspektorati Farmaceutik, vlera e të cilave shkon mbi 3 mijë euro.
Me urdhër të prokurorit, kanë nisur hetimet për tri vepra penale ‘Kontrabandim me mallra’, ‘Shmangie nga tatimi’ dhe ‘Tregti e ndaluar’./Sinjali/
