Pronari i Spitalit “Sirona” Prof. Shefqet Lulaj i ka reaguar ashpër kryetarit të Komunës së Gjilanit Lutfi Haziri, për rastet pozitive me koronavirus.
Haziri mbrëmë në një mbledhje të jashtëzakonshme të mbajtur me qendrën operative live në Facebook, ka deklaruar se rastet pozitive në Gjilan janë si rezultat i infektimit nga një infermiere nga spitali privat në Prishtinë duke aluduar në “Sironën”, shkruan Gazeta Shneta.
Por këtë po e hedh poshtë profesori Lulaj i cili ka thënë se kryetari Haziri po e luan rolin e epidemiologut. Lulaj ka thënë se burimi i infeksionit në fakt është në Gjilan, ku nëna e infermieres e cila punon në “Sirona”, kishte shfaqur simptoma më herët.
“Kryetari i Komunes së Gjilanit po e luan rolin e Epidemiologut, po e dinë kah po levizë virusi. Burimin si duket e ka në Gjilan, sepse infermierja e spitalit tonë e paska nënën infermiere ne Gjilan dhe paska pas shqetësime shëndetsore në shtëpi, e cila per fat te keq , se bashku me anëtaret tjerë të famijes kanë rezultuar poz. Edhe tri kolege te nënës në Spital të Gjilanit kanë rezultuar poz. gjithashtu. Na vjen keq dhe ju dëshirojmë sherim të gjithëve. Zotni Luta e ka tepruar pasi tere ditën po jap informata se atyre virusi ju paska ardhë nga një spital privat, dezinformim i pastër. I bejmë thirrje që të lejoj që mendimin të japin ekspertët e thirrur për këtë dhe mos të luaj me ndjenjat e njerzve edhe ashtu të renduara”, thuhet në reagimin e Lulajt, të cilin e ka dërguar në adresë të Gazetës Shneta.