Hulumtimi i ri ka zbuluar një rol potencialisht të rëndësishëm që suplementet e xhenxhefilit mund të luajnë në kontrollin e inflamacionit për njerëzit që jetojnë me sëmundje autoimune.
Hulumtimi i publikuar në “JCI Insight” u përqendrua në ndikimin e suplementeve të xhenxhefilit në një lloj qelize të bardhë të gjakut të quajtur neutrofil. Studimi ishte veçanërisht i fokusuar në formimin e kurthit jashtëqelizor të neutrofilit (NET), i njohur gjithashtu si NETosis, dhe çfarë mund të nënkuptojë mbi kontrollin e inflamacionit, shkruan Medical Xpress përcjell Gazeta Shneta.
Studimi zbuloi se konsumimi i xhenxhefilit nga individë të shëndetshëm i bën neutrofilet e tyre më rezistente ndaj NETosis. Kjo është e rëndësishme sepse NETosis janë struktura mikroskopike të ngjashme me rrjetën e merimangës që nxisin inflamacionin dhe mpiksjen, të cilat kontribuojnë në shumë sëmundje autoimune, duke përfshirë lupusin, sindromën antifosfolipide dhe artritin reumatoid.
“Ka shumë sëmundje ku neutrofilet janë anormalisht tepër aktivë. Ne zbuluam se xhenxhefili mund të ndihmojë në frenimin e NETosis, dhe kjo është e rëndësishme sepse është një suplement natyral që mund të jetë i dobishmëm për trajtimin e inflamacionit dhe simptomave për njerëzit me disa sëmundje të ndryshme autoimune”, tha bashkautorja Dr. Kristen Demoruelle, profesoreshë e asociuar e mjekësisë në Universitetin e Kolorados.
Në një provë klinike, studiuesit zbuluan se marrja ditore e një suplementi xhenxhefili për shtatë ditë (20 mg gingerolë/ditë) nga vullnetarë të shëndetshëm rriti një kimikat brenda neutrofilit të quajtur AMPc. Këto nivele të larta të AMPc më pas frenuan NETosis në përgjigje të stimujve të ndryshëm të lidhur me sëmundjen.
“Kërkimi ynë, për herë të parë, ofron prova mbi mekanizmin biologjik që qëndron në themel të vetive të dukshme anti-inflamatore të xhenxhefilit tek njerëzit,” tha bashkëautori i lartë Dr. Jason Knight, profesor i asociuar në Divizionin e Reumatologjisë në Universiteti i Miçiganit.
Studiuesit thonë se shumë njerëz me kushte inflamatore ka të ngjarë të pyesin ofruesit e tyre të kujdesit shëndetësor nëse suplementet natyrale mund të jenë të dobishme për ta ose ata tashmë marrin suplemente, si xhenxhefili, për të ndihmuar në menaxhimin e simptomave. Fatkeqësisht, ndikimi i saktë në sëmundje shpesh është i panjohur.
Studiuesit shpresojnë që ofrimi i më shumë dëshmive në lidhje me përfitimet e xhenxhefilit, duke përfshirë mekanizmin e drejtpërdrejtë me të cilin xhenxhefili ndikon në neutrofilet, do të inkurajojë ofruesit e kujdesit shëndetësor dhe pacientët që të diskutojnë në mënyrë më strategjike nëse marrja e suplementeve të xhenxhefilit si pjesë e planit të tyre të trajtimit mund të jetë e dobishme. /Gazeta Shneta/