Këtë javë, Organizata Botërore e Shëndetësisë (OBSH) publikoi udhëzime të reja duke rekomanduar që njerëzit të zëvendësojnë kripën e zakonshme që përdorin në shtëpi me alternativa që përmbajnë më pak natrium.
Por çfarë janë saktësisht këto alternativa të kripës? Dhe pse OBSH po e rekomandon këtë? Le t’i hedhim një vështrim.
Një zgjidhje e re për një problem të vjetër
Këshilla për të konsumuar më pak kripë (klorur natriumi) nuk është e re. Ajo ka qenë pjesë e udhëzimeve ndërkombëtare dhe australiane për dekada. Kjo sepse hulumtimet tregojnë qartë se natriumi në kripë mund të dëmtojë shëndetin tonë kur e konsumojmë në sasi të tepërt, shkruan burimi The Conversation transmeton Gazeta Shneta.
Konsumi i tepërt i natriumit rrit rrezikun e hipertensionit (presionit të lartë të gjakut), i cili prek miliona njerëz (rreth 1 në 3 të rritur). Hipertensioni, nga ana tjetër, rrit rrezikun e sëmundjeve të zemrës, goditjes në tru dhe sëmundjeve të veshkave, ndër të tjera.
OBSH vlerëson se 1.9 milionë vdekje në botë çdo vit mund t’i atribuohen konsumit të tepërt të kripës.
Mes tjerash, OBSH rekomandon të mos konsumohen më shumë se 2 gramë natrium në ditë. Megjithatë, mesatarisht, njerëzit konsumojnë më shumë se dyfishin e kësaj sasie, rreth 4.3 gramë në ditë.
Në vitin 2013, shtetet anëtare të OBSH-së u zotuan të reduktojnë marrjen e natriumit në nivel popullate me 30% deri në vitin 2025.
Por ulja e konsumit të kripës ka rezultuar shumë e vështirë. Shumica e vendeve, përfshirë Australinë, nuk do të arrijnë objektivin e OBSH-së për reduktimin e natriumit deri në vitin 2025.
Hyrja në skenë e kripës së pasur me kalium
Alternativa kryesore e kripës me më pak natrium quhet kripë e pasur me kalium.
Kaliumi është një mineral thelbësor, që luan një rol kyç në të gjitha funksionet e trupit. Përmbajtja e lartë e kaliumit në frutat dhe perimet e freskëta është një nga arsyet kryesore pse ato janë të mira për shëndetin. Ndërkohë që njerëzit konsumojnë më shumë natrium sesa duhet, shumica nuk marrin mjaftueshëm kalium.
OBSH rekomandon një konsum ditor të kaliumit prej 3.5 gramësh, por në shumicën e vendeve njerëzit konsumojnë ndjeshëm më pak se kjo sasi.
Kripa e pasur me kalium sjell përfitime shëndetësore duke reduktuar sasinë e natriumit që konsumojmë dhe duke rritur marrjen e kaliumit. Të dyja ndihmojnë në uljen e presionit të gjakut.
Zëvendësimi i kripës së zakonshme me kripë të pasur me kalium është treguar se redukton rrezikun e sëmundjeve të zemrës, goditjes në tru dhe vdekjes së parakohshme në studime të mëdha në të gjithë botën. /Gazeta Shneta/