Një studim i ri tregon se të rinjtë në mbarë botën po përballen gjithnjë e më shumë me vështirësi në shëndetin mendor dhe në përballimin e jetës së përditshme. Sipas hulumtimit të realizuar nga ‘Sapien Labs’, të rinjtë evropianë rezultojnë ndër më të prekurit krahasuar me bashkëmoshatarët e tyre në kontinente të tjera.
Studimi përdori një tregues të quajtur “Mind Health Quotient (MHQ)”, i cili mat gjendjen mendore përmes anketave online në Azi, Afrikë, Evropë dhe Amerikë. Ky indeks vlerëson aftësitë emocionale, sociale, njohëse dhe fizike që i ndihmojnë njerëzit të funksionojnë mirë në jetë, punë dhe marrëdhënie.
Sipas autores së raportit, Tara Thiagarajan, kriza e shëndetit mendor po përkeqësohet nga një brez në tjetrin dhe shkon përtej rritjes së rasteve të depresionit dhe ankthit, raporton Euronews Health transmeton Gazeta Shneta.
Rezultatet tregojnë se personat mbi 55 vjeç kanë një nivel relativisht të qëndrueshëm të shëndetit mendor, ndërsa çdo brez më i ri ka rezultate më të ulëta.
Të rinjtë nga 18 deri në 34 vjeç kanë një mesatare prej vetëm 36 pikësh MHQ dhe rreth 41 për qind e tyre raportojnë probleme serioze të shëndetit mendor.
Sa i përket Evropës, Italia është vendi me rezultatin më të mirë në kontinent, ndërsa vende si Gjermania, Irlanda dhe Mbretëria e Bashkuar, renditen ndër më të dobëtit. Çuditërisht, rënia e mirëqenies mendore është më e theksuar në vendet më të pasura dhe më të zhvilluara.
Studimi identifikoi katër faktorë kryesorë që ndikojnë në këtë situatë: Marrëdhëniet familjare, spiritualiteti, përdorimi i hershëm i telefonave inteligjentë dhe konsumi i ushqimeve ultra të përpunuara.
Marrëdhëniet e dobëta familjare rrisin ndjeshëm rrezikun për probleme mendore. Po ashtu, të rinjtë që ndihen më pak të lidhur me besimin apo spiritualitetin raportojnë gjendje më të dobët mendore.
Një tjetër faktor është përdorimi i hershëm i telefonave inteligjentë. Mesatarisht, brezi i ri merr telefonin e parë rreth moshës 14 vjeç, ndërsa në Evropë kjo ndodh shpesh mes moshës 12 dhe 13 vjeç.
Gjithashtu, rritja e konsumit të ushqimeve ultra të përpunuara gjatë 15 viteve të fundit lidhet me një pjesë të konsiderueshme të problemeve të shëndetit mendor. /Gazeta Shneta/