Një qasje gjithëpërfshirëse konsiderohet e nevojshme për trajtimin e rosacesë gjatë shtatzënisë, për shkak të ndikimit emocional te pacientet dhe rreziqeve të mundshme për fetusin nga disa trajtime mjekësore, sipas një rishikimi shkencor të publikuar në revistën “SKIN”.
Studiues nga Kolegji i Mjekësisë Osteopatike në Filadelfia analizuan trajtimet e rosacesë gjatë shtatzënisë përmes një rishikimi sistematik që përfshiu 20 studime me gjithsej 230 paciente që vuanin nga forma të rënda të sëmundjes.
Në analizë u përfshinë disa forma trajtimi, si antibiotikët, kortikosteroidët, antiseptikët lokalë, kompresat e lagështa dhe trajtimi osteopatik manual. Megjithatë, u raportuan edhe komplikime serioze tek disa paciente shtatzëna, përfshirë dëmtime okulare, probleme të kornesë, aritmi fetale, ulje të lëngut amniotik dhe madje vdekje intrauterine.
Përveç rreziqeve fizike, studiuesit vunë në dukje edhe ndikimin e rëndë psikologjik të sëmundjes, ku disa paciente përjetuan ankth dhe depresion të theksuar, ndërsa në raste të caktuara u raportua edhe vendimi për ndërprerje të shtatzënisë.
Autorët theksojnë se rezultatet mbështesin përdorimin e një strategjie trajtimi të shumëanshme, e cila kombinon barna të sigurta për shtatzëninë me metoda holistike si terapia osteopatike manuale.
Sipas tyre, edhe pse disa medikamente ofrojnë përfitime terapeutike, rreziku potencial për fetusin kërkon kujdes të shtuar dhe vlerësim të individualizuar të çdo rasti. /Gazeta Shneta/