Edhe nëse një person ushtron rregullisht, kalimi i shumë orëve ulur gjatë ditës mund të ketë pasoja negative për shëndetin.
Studime të shumta kanë treguar se qëndrimi i zgjatur ulur lidhet me rritje të rrezikut për sëmundje të zemrës, diabet të tipit 2, obezitet dhe vdekje të parakohshme, shkruan AHA, transmeton Gazeta Shneta.
Kur trupi qëndron ulur për periudha të gjata, metabolizmi ngadalësohet, muskujt përdorin më pak energji dhe qarkullimi i gjakut bëhet më pak efikas.
Kjo mund të ndikojë në nivelin e sheqerit në gjak, presionin arterial dhe metabolizmin e yndyrave.
Ekspertët paralajmërojnë se shumë njerëz kalojnë më shumë se tetë orë në ditë ulur, veçanërisht në punët që kërkojnë përdorimin e kompjuterit. Për këtë arsye rekomandohet që personat të ngrihen dhe të lëvizin për disa minuta çdo 30 deri në 60 minuta.
Ecja e shkurtër, shtrirjet e muskujve ose kryerja e detyrave në këmbë mund të ndihmojnë në zvogëlimin e efekteve negative të qëndrimit të gjatë ulur.
Specialistët theksojnë se kombinimi i aktivitetit fizik të rregullt me ndërprerje të shpeshta të kohës së kaluar ulur është një nga mënyrat më të mira për të mbrojtur shëndetin afatgjatë.