Në Qendrën Klinike Stomatologjike Universitare të Kosovës (QKSUK) është realizuar, një protezë speciale dentare (obturator protetik) që përdoret për të mbyllur hapësirat e krijuara në qiellzë ose në nofullën e sipërme pas ndërhyrjeve kirurgjikale, duke rikthyer funksionet normale të gojës dhe pamjen estetike.
Sipas njoftimit zyrtar nga Shërbimi Spitalor Klinik dhe Universitar i Kosovës (ShSKUK), pacienti A.S., i lindur në vitin 1971, ka kaluar trajtim kirurgjikal në Klinikën e Kirurgjisë Maksillofaciale pas diagnostikimit me karcinomë skuamoze orale në stadin e tretë (një formë e kancerit të zgavrës së gojës). Gjatë operacionit ishte hequr një pjesë e nofullës së sipërme për shkak të përhapjes së sëmundjes, transmeton Gazeta Shneta.
Pas trajtimit kirurgjikal dhe onkologjik, ekipi specialist i QKSUK-së ka vlerësuar defektin e krijuar nga operacioni dhe ka vendosur rehabilitimin e pacientit përmes vendosjes së obturatorit protetik.
Sipas QKSUK-së, ky trajtim është realizuar në kuadër të bashkëpunimit multidisiplinar për menaxhimin e rasteve komplekse dhe në përputhje me protokollet e protetikës maksilofaciale.
“Ky rehabilitim ka për qëllim përmirësimin e funksioneve orale, duke përfshirë të folurin, gëlltitjen, mastikacionin, si dhe rikthimin e integritetit anatomik dhe cilësisë së jetës së pacientit”, thuhet në njoftimin e SHSKUK-së. /Gazeta Shneta/