Studime të reja klinike sugjerojnë se personat me obezitet mund të ruajnë pjesën më të madhe të peshës së humbur edhe pas uljes së dozës së barnave moderne për dobësim ose pas kalimit nga injeksionet në tableta ditore.
Barnat që imitojnë hormonin GLP-1, si tirzepatidi dhe semaglutidi, kanë treguar rezultate të konsiderueshme në uljen e peshës trupore. Megjithatë, një nga sfidat kryesore mbetet rikthimi i peshës pas ndërprerjes së trajtimit, shkruan burimi Medical News Today transmeton Gazeta Shneta.
Dy studime të fundit analizuan strategji të ndryshme për ruajtjen afatgjatë të rezultateve. Në studimin e parë, personat që kishin përdorur doza të larta të barnave injektuese kaluan në një tabletë ditore. Pas një viti, shumica e tyre ruajtën pjesën më të madhe të peshës së humbur, megjithëse u vu re një rikthim i kufizuar i kilogramëve.
Në studimin e dytë, pjesëmarrësit që kishin përdorur doza të larta të tirzepatides ulën trajtimin në një dozë mirëmbajtëse më të vogël.
Edhe në këtë rast, humbja e peshës u ruajt në masë të madhe krahasuar me personat që ndërprenë plotësisht terapinë.
Sipas ekspertëve, këto rezultate përputhen me përvojën klinike të përditshme.
Shumë pacientë arrijnë të mbajnë peshën e fituar pas dobësimit duke vazhduar trajtimin me doza më të ulëta, çka mund të përmirësojë tolerancën ndaj barnave dhe të ulë barrën e trajtimit.
Gjetjet tregojnë se obeziteti është një gjendje kronike që shpesh kërkon menaxhim afatgjatë. Strategjitë si ulja graduale e dozës ose kalimi në forma orale të trajtimit mund të ofrojnë alternativa më praktike dhe më të përshtatshme për ruajtjen e rezultateve në afat të gjatë. /Gazeta Shneta/