QKUK e ka shpërblyer operatorin më të shtrenjtë për furnizim me pajisje dhe shtretër në Klinikën e Nefrologjisë.
Qendra Klinike Universitare e Kosovës e ka shpërblyer operatorin më të shtrenjtë për furnizim me pajisje dhe shtretër për dializë në Klinikën e Nefrologjisë, shkruan Gazeta Shneta.
QKUK ka nxjerr vendim për të shpërblyer kompaninë “Medi Health” me kontratë 843,750 Euro. Ky institucion ka lënë jashtë operator qindra mijëra euro më të lirë sesa kjo ofertë.
Ofertën më të lirë e ka pasur kompania “Medicom” me 584,505 Euro, ndërsa “Argo Med” me 684,774 Euro.
Gazeta ka raportuar për këtë tender edhe në muajin prill kur ishte shpallur, meqë për të njëjtin ishin ngritur dyshime se janë përshtatur specifikat për operator të caktuar.
Kjo, meqë në një lot janë vendosur pajisjet dhe shtretërit, gjë e cila nuk është në praktikën e tenderëve meqë janë pajisje të ndryshme.
Gjithashtu në këtë njoftimin për kontratë ishte kërkuar që blerja të bëhet me urgjencë, por duke mos e faktuar gjendjen se për çfarë urgjence bëhet fjalë. Kërkesa për urgjencë nuk është sqaruar se nga kush është bërë, nga drejtoria e Klinikës së Nefrologjisë apo nga Sektori i Pajisjeve në QKUK.
Ndërkaq në muajin korrik QKUK ia dha një tjetër tender emergjent kompanisë “Medi Health” për furnizim me material për dializë.
Tenderi emergjent ishte shpallur të premten në ora 13:00 dhe ishte mbyllur të hënën në ora 12:00. Kontrata dy mujore do t’i kushtojë SHSKUK-së më shumë se 347 mijë euro.
SHSKUK gjatë gjithë kohës e ka mohuar se ka mungesë dhe vështirësi në furnizim të hemodializës. Por pikërisht për shkak të mungesave, shpalli tenderin emergjent. /Gazeta Shneta/