Para dy muajsh Qendra Klinike Universitare ka dixhitalizuar pagesat e parkingut brenda hapësirave të saj.
Pagesa bëhet me intervale kohore. Për 30 minuta kushton 0.50 euro, ndërsa tarifa rritet për po aq para deri në 1 orë. Tutje faturës i shtohen 0.50 për çdo orë qëndrim me veturë brenda hapësirave të QKUK-së.
Pagesat bëhen në dalje të QKUK-së dhe ato evidentohen me anë të një kuponi i cili nuk është i fiskalizuar.
Për këtë ka reaguar aktivistja e shoqërisë civile Besa Luzha, e cila ka kërkuar llogari pse parkingu në QKUK nuk i paguan shtetit TVSH-në.
Menaxheri i parkingut Faton Hajzeraj ka deklaruar se QKUK është institucion joprofitabil dhe të gjitha të hyrat shkojnë në arkën e shtetit.
“Parkingu menaxhohet nga vet institucioni, jo nga kompani private. Kjo i bjen si me pagu TVSH në tatim të shtetit”, thotë ai.
Hajzeraj shton tutje se kjo çështje është e rregulluar me ATK-në, ndërsa për arkat fiskale janë të gatshëm të bashkëpunojnë poashtu.
“Ne jemi të gatshëm të bashkëpunojmë me ATK për arkat nëse ata munden me na ofru lidhje të arkës me sistem të pagesave, në të cilat përfshihen listat e personave që janë të liruar nga pagesa”, ka thënë Hajzeraj.
Dixhitalizimi i parkingut në QKUK ka arritur të shmangë tollovitë dhe bllokimin e komunikacionit brenda QKUK-së. /Gazeta Shneta/