Rastet e virusit të Nilit Perëndimor këtë vit po rriten ndjeshëm, duke u regjistruar 40% më shumë se zakonisht, sipas të dhënave të Centers for Disease Control and Prevention (CDC).
Deri në fillim të shtatorit janë raportuar mbi 770 raste, përfshirë rreth 490 raste të rënda, ndërsa zakonisht në këtë periudhë numërohen rreth 550 raste, 350 prej të cilave të rënda.
Autoritetet shëndetësore paralajmërojnë publikun për rrezikun, pasi shumica e infeksioneve transmetohen nga mushkonjat gjatë gushtit dhe shtatorit, shkruan MedicalXpress transmeton Gazeta Shneta.
Komisioneri i Shëndetit Publik në Massachusetts, Dr. Robbie Goldstein, u bëri thirrje njerëzve të mbrohen duke veshur rroba me mëngë të gjata dhe pantallona, si dhe duke përdorur repelentë të regjistruar nga EPA gjatë qëndrimit jashtë.
CDC shpjegon se rritja nuk lidhet me numrin e mushkonjave, por me përqindjen më të lartë të tyre që mbartin virusin. Faktorë si temperatura, reshjet, kontrolli i insekteve dhe infektimi i zogjve lokalë ndikojnë në përhapjen e virusit.
Disa zona, si Fort Collins në Colorado, janë identifikuar si vatra të nxehta, ku monitorimet treguan se 35 nga çdo 1,000 mushkonja femra ishin të infektuara, krahasuar me 8 për 1,000 që pritej zakonisht.
Shumica e infeksioneve janë të lehta ose pa simptoma, por rastet e rënda mund të shkaktojnë inflamacion të trurit ose palcës kurrizore dhe madje edhe vdekje.
CDC paralajmëron se vdekjet këtë vit mund të jenë më të larta, por statistikat janë ende paraprake. /Gazeta Shneta/