Mamia Razije Musa ka shkruar kësaj radhe për abortin. Ajo ka deklaruar se është kundër abortit nëse shtatzënia është e shëndetshme.
“Pasojat pas abortit mund të jenë të mëdha. Mund të ketë pasoja në fertilitet nëse aborti nuk është kryer në mënyrë profesionale. Gjendja emocionale e çdo femre që aborton kryesisht është e rëndë, ndjenjë faji, depresion, ç’rregullim i apetitit, ç’rregullim i gjumit, molisje e lodhje”, ka shkruar mamia, transmeton Gazeta Shneta.
Këshilla e saj e plotë:
Të dashura nana uroj të jeni mirë, sot dua të flas me ju për një çështje te ndjeshme por të nevojshme për t’u diskutuar. Dua të flas për abortin.
Fillimisht po u’a sqaroj se abort quhet ndërprerja e shtatëzanisë para javës së 24. Unë gjithmonë them se aborti duhet të bëhet vetëm kur ka arsye të forta shëndetësore, jam kundër abortit kur shtatëzania është e shëndetshme.
Arsyeja pse po ju shkruaj sot është se jam e shokuar nga lajmet në të cilat thuhet se një vajzë e mitur është detyruar të abortoj pa dëshirën e saj. I mbetet organeve të drejtësisë t’a hulumtoj rastin por nëse gjithçka qëndron ashtu unë nuk dua të mendoj për atë se çfarë ka përjetuar ajo vajzë.
Kam parë nana që është dashur të abortojnë për arsye shëndetësore, ato kanë qenë të thyera emocionalisht pa forcë për të dal nga spitali, pa dëshirë për të nxjerë një fjalë nga goja.
Pasojat pas abortit mund të jenë të mëdha. Mund të ketë pasoja në fertilitet nëse aborti nuk është kryer në mënyrë profesionale. Gjendja emocionale e çdo femre që aborton kryesisht është e rëndë, ndjenjë faji, depresion, ç’rregullim i apetitit, ç’rregullim i gjumit, molisje e lodhje.
Kur thash se aborti duhet të kryhet në mënyrë profesionale nënkupton atëherë kur ka arsye shëndetësore dhe të kryhet nga njerëz që janë të thirrur për t’a bërë, në të kundërten mund të ndodhë që pas procedures pacientja të ketë gjakderdhje të mëdha, infeksione apo mbetje embrionale brenda .
Unë jam nanë e një vajzë gjyshe e dy mbesave, jam e prekur emocionalisht me atë që lexova këto dy ditë. Nuk dua të mendoj se si ndjehet nana e një vajzë që përjeton dhunë seksuale dhe abort pa dëshirë. Përveç këshillës profesionale se aborti nuk duhet kryhet pa arsye shëndetësore, si nanë po ju them përpiquni të jeni shokë të fëmijëve tuaj.
Tentoni të jeni ata me të cilët fëmijët do të flasin për çdo problem.
Me dashuri, Razija