Një fotografi ku shihet një informatë nga salla e lindjes në Klinikën e Gjinekologjisë ku pacienteve iu kërkohet që para se të shkojnë për të lindur duhet të pajisen me dorëza dhe sasi të oxytocines, ka qarkulluar ditët e fundit nëpër rrjetet sociale. Mungesa e dorëzave nuk ka ardhur si pasojë e mungesës së buxhetit por operatori ekonomik ende nuk e ka kryer furnizimin ndonëse ka kontratë deri në fund të vitit
Mungesa e dorëzave sterile dhe medikamenteve ka shkaktuar pakënaqësi të shumta tek qytetarët të cilët kanë reaguar ashpër në profilet e tyre, shkruan Gazeta Shneta.
“Kur absurditeti kalon çdo kufi!”, ka shkruar gazetarja Donika Dabishevci teksa ka postuar edhe fotografinë.
“Per ‘nderim’ te shtetit qe planifikon me investu vec edhe 1 miliard euro asfallt, perderisa ne spitale mungojne materialet me bazike per nje trajtim te ndergjegjshem shendetesor. Keqmenaxhimi i parase publike eshte krim”, ka shkruar avokati Besnik Berisha.
Edhe reagime të tjera janë publikuar në rrjetet sociale, por Gazeta Shneta ka mësuar se QKUK ka kontratë valide për furnizim me dorëza sterile deri në fund të këtij viti, ndërsa mungesa ka ardhur si pasojë e mosfurnizimit nga ana e operatorit ekonomik.
Ndërkaq sa i përket medikamentit oxytocin ende nuk është tenderuar nga QKUK. /Gazeta Shneta/