Senatori amerikan, John McCain, ka thënë se mjekët i kanë dhënë atij një “prognozë shumë, shumë serioze”, teksa ai po përballet me kancerin në tru.
“Disa thonë 3 për qind, disa thonë 14 për qind”, ka thënë McCain në një intervistë për televizionin CBS, teksa ka folur për gjasat e tij për mbijetesë.
McCain i është nënshtruar në korrik një operacioni për heqjen e një tumori në tru, që më pas kishte dalë të ishte një formë e glioblastomës, i njëjti lloj i kancerit që i kishte marrë jetën ish-kolegut të tij në Senat, Edward M. Kennedy, më 2009.
McCain ka treguar se e ka Kennedyn në mendje shpesh. Senatori ka thënë se Kennedy ka vazhduar të punojë, përkundër diagnozës, dhe “nuk është dorëzuar kurrë, për shkak se e donte angazhimin”.
Kenney, ka treguar McCain në CBS, “ka mbajtur punën, ka vazhduar të punojë, të ecën përpara, edhe kur ka qenë në karrocë”.
McCain, senator republikan nga Arizona, i cili është cilësuar i pavarur për shkak të refuzimit të tij për të votuar për projektligjet e republikanëve për përkujdesjen shëndetësore, po përpiqet të veprojë sikur i ndjeri.
“Jam më energjetik dhe më i angazhuar, si rezultat i kësaj, sepse e di që duhet të bëj gjithçka që mundem për t’i shërbyer këtij vendi, deri sa të mundem”, ka thënë McCain, i cili e nis ditën me kimioterapi dhe rrezatim./Gazetaexpress/