Vaksinat po rezultojnë efektive në reduktimin e infeksioneve SARS-CoV-2, shtrimeve në spital dhe vdekjeve.
Të gjitha vaksinat e miratuara kanë kaluar nëpër prova klinike të rastësishme për të testuar cilësinë, sigurinë dhe efikasitetin e tyre, shkruan Medical News Today përcjell Gazeta Shneta.
Megjithatë, zhvillimi i shpejtë i vaksinave mbi COVID-19 do të thotë se këto prova nuk ishin mjaft të mëdha për të zbuluar ngjarje të padëshiruara shumë të rralla.
Një studim i fundit zbuloi se rreziku i komplikimeve neurologjike ishte më i lartë tek njerëzit që rezultuan pozitiv ndaj COVID-19 sesa tek ata që kishin marrë vaksina kundër infeksionit.
Vaksinat kundër COVID-19 i nënshtrohen testimit në prova të mëdha klinike të rastësishme përpara se të licencohen për përdorim.
Përshembull, vaksina Oxford/AstraZeneca, iu nënshtrua testimit në më shumë se 11,000 njerëz nga e gjithë Mbretëria e Bashkuar dhe Brazili.
Për më tepër, mbi 43,000 individë u angazhuan në testimin e provave klinike të vaksinës Pfizer/BioNTech.
Pavarësisht nga përmasat e mëdha të këtyre studimeve, ata nuk ishin në gjendje të zbulonin ngjarje negative shumë të rralla – ato që ndodhin si një raport ‘një ngjarje në 10,000 raste’.
Ndërsa çdo ditë e më shumë, kemi popullsi nga e gjithë bota që vaksinohen kundër SARS-CoV-2, vlerësimet rrezik/përfitimet të këtyre vaksinave janë gjithnjë e më të rëndësishme.
Identifikimi i ngjarjeve të rralla anësore të lidhura me vaksinat janë tani një prioritet shkencor global.
Një rrezik i shtuar i trombozës së sinusit venoz cerebral pas vaksinës së Oksfordit është një shembull i një ngjarjeje të rrallë negative të lidhur me vaksinat.
Disa vende e kanë kufizuar përdorimin e kësaj vaksine tek individët me rrezik të ulët derisa studiuesit të kenë mbledhur informacione të mëtejshme.
Shkencëtarët në Mbretërinë e Bashkuar së fundmi përfunduan një studim të madh, të bazuar në popullatë.
Ata krahasuan rrezikun e komplikimeve neurologjike tek njerëzit me një infeksion SARS-CoV-2 me individë që kishin marrë së fundmi një dozë të parë të vaksinave Oxford-AstraZeneca ose Pfizer-BioNTech.
Rezultatet e tyre u shfaqen në Nature Medicine.
Megjithëse SARS-CoV-2 prek kryesisht sistemin e frymëmarrjes, ka prova që koronaviruset mund të sulmojnë sistemin nervor. Kjo mund të rezultojë në komplikime të ndryshme.
Ngjarjet shumë të rralla neurologjike kanë gjithashtu lidhje me vaksinat e COVID-19, duke përfshirë mielitin transversal, sindromën Guillain-Barré dhe paralizën e Bell-it.
Studiuesit në Universitetin e Oksfordit, drejtuan hulumtimin e fundit rreth këtyre ngjarjeve shumë të rralla duke marrë të dhëna të botës reale nga mbi 32 milionë të informacioneve të kujdesit shëndetësor të njerëzve të vaksinuar në Angli.
Këto të dhëna përfshinin 2 milionë individë me një test pozitiv SARS-CoV-2 – ku prej tyre, rreth 90% rezultuan pozitivë përpara vaksinimit.
Shkencëtarët llogaritën rrezikun e zhvillimit të komplikimeve neurologjike brenda 28 ditëve pas dozës së parë të vaksinave Oxford/AstraZeneca ose Pfizer/BioNTech brenda 28 ditëve nga një test pozitiv SARS-CoV-2.
“Në përgjithësi, gjetjet nga ky studim tregojnë se rreziqet e shtrimit në spital nga komplikimet të sistemit nervor të lidhura me infeksionin COVID-19 janë më të mëdha se rreziqet që lidhen me vaksinat kundër COVID-19; duke theksuar përfitimet e programeve të vazhdueshme të vaksinimit.” /Gazeta Shneta/