Zyrtarët britanikë të shëndetësisë që hulumtuan shkakun e një rritjeje të hepatitit akut, ose inflamacionit të mëlçisë në mesin e fëmijëve thanë se ka prova në rritje se ai është i lidhur me një virus të zakonshëm.
Agjencia e Sigurisë Shëndetësore në Mbretërinë e Bashkuar, ka regjistruar 111 raste të hepatitit të pashpjegueshëm tek fëmijët nën 10 vjeç që nga janari, shkruan MedicalxPress përcjell Gazeta Shneta.
Dhjetë nga fëmijët kishin nevojë për transplantim të mëlçisë. Agjencia shëndetësore e OKB-së tha se deri më tani kanë marrë raporte për të paktën 169 raste të “hepatitit akut me origjinë të panjohur” dhe se një vdekje ishte raportuar po ashtu.
Ndërsa nuk është e qartë se çfarë i shkakton sëmundjet, një i dyshuar kryesor është adenovirusi, i cili u zbulua në 75% të rasteve të konfirmuara në bazë të testimeve, tha agjencia e Mbretërisë së Bashkuar në një deklaratë gjatë ditës së hënë.
Adenovirusi, një grup i zakonshëm virusesh, tani po qarkullon tek fëmijët në nivele më të larta se mesatarja pasi ka rënë në nivele jashtëzakonisht të ulëta gjatë pandemisë.
Një rrugë hetimi që po eksplorohet është se shpërthimi mund të lidhet me një rritje të infeksioneve të zakonshme virale pasi kufizimet e COVID-19 u hoqën gradualisht.
Për të mësuar më shumë rreth komplikimeve të shtatzënisë KLIKO KËTU.
Fëmijët që nuk ishin ekspozuar ndaj adenovirusit gjatë dy viteve të fundit, tani mund të goditen më shumë kur ekspozohen ndaj viruseve.
“Informacioni i mbledhur përmes hetimeve tona sugjeron gjithnjë e më shumë se kjo rritje e hepatitit me fillim të papritur tek fëmijët është e lidhur me infeksionin adenovirus,” tha Dr. Meera Chand, drejtoreshë e Klinikës Infektive në njërën nga qendrat në Mbretërinë e Bashkuar.
Dr. Chand prezantoi të dhënat britanike të hënën gjatë një sesioni urgjent të Kongresit Evropian të Mikrobiologjisë Klinike dhe Sëmundjeve Infektive në Lisbonë.
Viruset e zakonshme që shkaktojnë inflamacion infektiv të mëlçisë – hepatiti A në E – nuk u zbuluan në asnjë nga 111 rastet që po hetoheshin në Mbretërinë e Bashkuar. Viktimat pësuan simptoma të tilla si verdhëza, diarre dhe dhimbje barku.
Mëlçia përpunon lëndët ushqyese, filtron gjakun dhe lufton infeksionet. Hepatiti mund të jetë kërcënues për jetën nëse nuk trajtohet.
Ka dhjetëra adenovirusë, disa prej tyre të lidhur me simptoma të ngjashme me të ftohjen, ethet, dhimbje të fytit dhe syrin rozë.
Autoritetet amerikane thanë në fillim të këtij muaji se po hetonin një grup rastesh të pashpjegueshme të hepatitit të diagnostikuara në nëntë fëmijë të Alabama-së, të cilët gjithashtu rezultuan pozitivë për adenovirus.
Zyrtarët atje po eksplorojnë një lidhje me një version të veçantë – adenovirus 41 – që zakonisht lidhet me inflamacionin e zorrëve. /Gazeta Shneta/