Një studim i gjerë në Angli tregon se 11 lloje kanceri po shfaqen gjithnjë e më shpesh tek të rinjtë, por kjo rritje nuk shpjegohet plotësisht nga faktorët klasikë të stilit të jetesës.
Studiues nga Instituti Kërkimor mbi Kancerin dhe Kolegji Imperial i Londrës analizuan të dhënat nga viti 2001 deri në 2019 për persona 20–49 vjeç dhe identifikuan rritje në kancerin e gjirit, zorrës së trashë, pankreasit, veshkave, mëlçisë, tëmthit, tiroides, mielomës multiple, kancerit oral, endometrial dhe ovarian, shkruan burimi Euronews Health transmeton Gazeta Shneta.
Edhe pse shumica e këtyre kancereve janë më të zakonshëm tek të moshuarit, rritja tek të rinjtë sugjeron faktorë të përbashkët, por edhe specifikë për moshën.
Veçanërisht, kanceri kolorektal dhe ai ovarian po rriten vetëm tek të rinjtë, duke treguar ndikimin e faktorëve të veçantë për këtë grupmoshë.
Faktorët e njohur si duhani, alkooli, dieta dhe aktiviteti fizik shpjegojnë vetëm një pjesë të rasteve (7%–65%), por nuk janë rritur kohët e fundit tek të rinjtë.
Në fakt, pirja e duhanit dhe konsumi i mishit të përpunuar kanë rënë, ndërsa aktiviteti fizik është përmirësuar. Përjashtimi kryesor është obeziteti, i cili është rritur dhe mbetet një faktor i rëndësishëm rreziku.
Megjithatë, studiuesit theksojnë se obeziteti nuk e shpjegon i vetëm këtë trend. Ata kërkojnë hetime të mëtejshme për faktorë të rinj, ndikime nga jeta e hershme dhe përmirësimet në diagnostikim.
Gjithashtu, theksohet nevoja për politika parandaluese dhe reduktimin e pabarazive shëndetësore.
/Gazeta Shneta/