Temperaturat ekstreme të shkaktuara nga ndryshimet klimatike mund të lidhen me rritjen e vdekjeve dhe paaftësisë nga goditja në tru, sugjeron një studim i ri.
Ndryshimet klimatike janë shoqëruar me një larmi të madhe rreziqesh shëndetësore, duke përfshirë sezonin e zgjatur të alergjive ndaj polenit, sëmundjet më të përhapura që transmetohen nga insektet dhe vdekjet e parakohshme, shkruan burimi Health News përcjell Gazeta Shneta.
Disa shkencëtarë e quajnë rritjen e temperaturave për shkak të ndryshimeve klimatike kërcënimin më të madh për shëndetin publik global.
Një studim i ri i publikuar në revistën “Neurology”, sugjeron se rreth gjysmë milioni vdekje nga goditjet në tru në nivel global mund të shoqërohen me temperatura ekstreme, duke zgjeruar listën e rreziqeve shëndetësore që vijnë nga ndryshimet klimatike.
Studiuesit shikuan të dhënat shëndetësore 30 vjeçare për më shumë se 200 vende dhe territore.
Ata ekzaminuan numrin e vdekjeve nga goditjet në tru dhe barrën e paaftësisë së lidhur me goditjet për shkak të temperaturave jo optimale – ato mbi ose nën temperaturat që lidhen me shkallën më të ulët të vdekjeve.
Temperaturat e ulëta u lidhën me 474,002 raste nga totali i vdekjeve. Kur temperatura bie, enët e gjakut të një personi mund të ngushtohen, duke rritur presionin e gjakut, i cili është një faktor rreziku për goditje në tru.
Temperaturat më të larta se optimale mund të rrisin rrezikun, pasi ato mund të shkaktojnë dehidrim, të ndikojnë në nivelet e kolesterolit dhe të rezultojnë në rrjedhje më të ngadaltë të gjakut.
Temperaturat nuk tregojnë asnjë shenjë ftohjeje, ku viti 2023 është viti më i ngrohtë i regjistruar.
Në fakt, 10 vitet më të ngrohta që nga fillimi i regjistrimeve globale në 1850 kanë ndodhur gjatë dekadës së fundit.
Shkalla e vdekjeve nga goditjet në tru nga ndryshimet e temperaturës për pjesëmarrësit meshkuj ishte 7.7 për 100,000 krahasuar me 5,9 për 100,000 për pjesëmarrëset femra.
“Nevojitet më shumë kërkime për të përcaktuar ndikimin e ndryshimit të temperaturës në goditje në tru dhe për të synuar zgjidhjet dhe për të adresuar pabarazitë shëndetësore,” tha autori i studimit Dr. Quan Cheng, i Universitetit Qendror të Xiangya Hospital në Changsha, Kinë. /Gazeta Shneta/