Sëmundja e Parkinsonit prek pothuajse 90,000 amerikanë të moshuar në vit, 30,000 më shumë se sa ishte vlerësuar më parë, sipas një studimi të botuar të enjten.
Normat e incidencës ndryshonin në të gjithë vendin.
Shtetet me norma më të larta të banorëve të moshuar panë më shumë diagnoza të sëmundjes, rreziku i së cilës zakonisht rritet me moshën shkruan USA Today përcjell Gazeta Shneta.
Rritja e niveleve të sëmundjes së Parkinsonit dhe kostos së trajtimeve dhe humbjes së të ardhurave do të thotë se të gjithë do të preken nga sëmundja qoftë drejtpërdrejt ose tërthorazi, tha Dr. Michael Okun, kryetar i neurologjisë në Kolegjin e Mjekësisë të Universitetit të Floridës në Gainesville.
“Një sëmundje si kjo mund të falimentojë sistemin e kujdesit shëndetësor,” tha Dr. Okun, i cili nuk ishte i përfshirë në hulumtim, por shërben si këshilltar mjekësor në Fondacionin e Parkinsonit.
“Është diçka të cilës ne të gjithë duhet t’i kushtojmë vëmendje.”
Çfarë është Parkinson?
Parkinson është një sindromë degjenerative që rezulton në humbjen e ngadaltë të qarkut të trurit të përfshirë në lëvizje, të menduarit dhe sjelljen. Mund të shkaktojë dridhje, ngurtësi, ngadalësim dhe rënie, përveç ankthit, depresionit dhe mosfunksionimit të gjumit.
Personat e famshëm që janë diagnostikuar me Parkinson përfshijnë aktorët Michael J. Fox dhe Alan Alda, boksierin Muhammad Ali, këngëtarët Linda Ronstadt dhe Neil Diamond.
Sa njerëz jetojnë me Parkinson?
Studimi i ri zbuloi se 90,000 amerikanë në vit diagnostikohen me Parkinson, nga vlerësimi i mëparshëm prej 60,000.
Ky zbulim bazohet në pesë studime të mëparshme të prevalencës, duke përfshirë të dhënat deri në vitin 2012, kështu që ka të ngjarë të nënvlerësohet dhe kjo statistikë, tha Dr. Okun.
Burrat kanë gati dy herë më shumë gjasa se gratë për të marrë diagnozën, sipas hulumtimit, dhe incidenca në përgjithësi rritet me moshën që fillon në të 60-at.
Një studim i vitit 2018 nga ‘Projekti i Prevalencës së Parkinsonit’ vlerësoi se 930,000 njerëz në SHBA do të jetonin me Parkinson deri në vitin 2020 dhe 1.2 milionë deri në vitin 2030, kryesisht të nxitur nga popullsia në plakje.
Pse po rriten normat?
Përgjigja më e thjeshtë është se amerikanët po plaken. Kjo ndoshta shpjegon rritjen e normave në shtete si Florida, të cilat janë destinacione për pensionistët.
Ekziston gjithashtu një lidhje e çuditshme midis pirjes së duhanit dhe Parkinsonit, ku duhanpirësit e rëndë duken më pak të prirur për të zhvilluar sëmundjen, tha Dr. Beck.
A mund të kontribuojnë edhe faktorët mjedisorë?
Hulumtimi është në fillimet e tij, por eksperti i Parkinsonit, Ray Dorsey ka arritur në përfundimin se sëmundja po rritet më shpejt se plakja, kështu që ka dhe faktorë të tjerë, me gjasë mjedisore.
Ndotja e ajrit gjithashtu mund të rrisë rrezikun e sëmundjes së Parkinsonit, tha Dorsey, si dhe agjenti degreasues Trikloretileni ose TCE.
Sa kushton një person me Parkinson në Amerikë?
Çdo familje e prekur nga Parkinson shpenzon rreth 26,000 dollarë në vit nga xhepi për të përballuar sëmundjen, tha Dr. Beck, shumë më tepër sesa shpenzohet për sëmundjet e zemrës dhe diabetin.
Një studim i mëparshëm nga ‘Fondacioni Michael J. Fox’, zbuloi se sëmundja e Parkinsonit i kushton SHBA-së 52 miliardë dollarë çdo vit dhe do të kushtojë 80 miliardë dollarë në vit deri në vitin 2037. /Gazeta Shneta/