Një studim i fundit nga Agjencia Ndërkombëtare për Kërkime mbi Kancerin (IARC) ka treguar se gratë pas menopauzës që janë mbipeshë ose obeze dhe zhvillojnë sëmundje kardiovaskulare (CVD) kanë rrezik më të lartë për kancer të gjirit.
Ky studim u përqendrua në mbi 170,000 gra nga dy grupe evropiane, pa histori të mëparshme të sëmundjeve të zemrës, diabetit tip 2 apo kancerit të gjirit, shkruan burimi Medical News Today transmeton Gazeta Shneta.
Gjatë një periudhe mesatare ndjekjeje prej 11 vjetësh, u zbulua se për çdo rritje prej 5 kg/m² në indeksin e masës trupore (BMI), gratë që kishin zhvilluar sëmundje të zemrës kishin 31% rrezik më të lartë për t’u prekur nga kanceri i gjirit.
Ky rrezik ishte dukshëm më i lartë krahasuar me gratë pa sëmundje të zemrës, të cilat kishin vetëm 13% rritje në rrezik.
Studiuesit nuk gjetën ndonjë lidhje midis diabetit tip 2 dhe rritjes së rrezikut për kancer të gjirit.
Megjithatë, mbipesha mund të shkaktojë inflamacion kronik, nivele të larta të insulinës dhe çrregullime hormonale, të cilat ndikojnë negativisht si në shëndetin e zemrës, ashtu edhe në gjendjen e gjirit.
Pas menopauzës, estrogjeni prodhohet kryesisht nga indi dhjamor, përfshirë edhe gjirin. Kjo rritje e hormonit mund të nxisë zhvillimin e qelizave anormale dhe të rrisë rrezikun për kancer.
Studiuesit theksuan se lidhja midis obezitetit, sëmundjeve të zemrës dhe kancerit të gjirit lidhet me procese të tilla si inflamacioni, rezistenca ndaj insulinës dhe çrregullimet hormonale. /Gazeta Shneta/