Operacionet elektive në Qendrën Klinike Universitare të Kosovës kanë rënë nga programi për shkak të mungesës së medikamentit Fentanyl, pa të cilin nuk mund të kryhen ndërhyrjet kirurgjike
QKUK gjatë ditës së sotme do të jetë në kolaps total sa i përket operacioneve. 32 sallat e operacioneve kanë rrëzuar programin elektiv. Kjo për shkakun se ka mungesë të medikamentit Fentanyl, shkruan Gazeta Shneta.
Pacientët që kanë qenë në pritje për të hyrë sot në operacion, do t’iu shtyhet për ndonjë ditë tjetër derisa klinikat të furnizohen me këtë medikament.
Gazeta ka kërkuar përgjigje nga QKUK nëse do të furnizohen sot me Fentanyl, por zyrtarët ende nuk kanë kthyer përgjigje.
Kjo është hera e tretë brenda disa muajve që klinikat e QKUK-së detyrohen t’i anulojnë të gjitha operacionet elektive për shkak të mungesës së Fentanylit. Herën e fundit ka ndodhur në muajin mars. Programi u anulua në disa klinika, ndërsa QKUK u furnizua me Fentanyl përkohësisht nga Spitali i Vushtrrisë. /Gazeta Shneta/