Kalimi nga një regjim ushqimor i pashëndetshëm në një dietë më të shëndetshme mund të përmirësojë funksionin e trurit, por mund të mos jetë i mjaftueshëm për të zhbërë plotësisht dëmet njohëse të shkaktuara nga konsumimi i tepërt i sheqerit. Ky është përfundimi i një studimi të ri të publikuar në revistën “Nutritional Neuroscience”.
Shëndeti i trurit priret të dobësohet gradualisht me kalimin e viteve, por ekspertët theksojnë se zgjedhjet e shëndetshme të jetesës, përfshirë ushqimin e ekuilibruar, aktivitetin fizik, gjumin cilësor dhe shmangien e duhanit, mund të ndihmojnë në ngadalësimin e këtij procesi, shkruan burimi Medical News Today transmeton Gazeta Shneta.
Për të kuptuar më mirë ndikimin e dietës në tru, studiuesit analizuan 27 studime të mëparshme të kryera tek minjtë laboratorikë. Kafshët u ushqyen për të paktën dy javë me dieta të pasura me yndyrna dhe sheqer. Më pas, një pjesë e tyre u rikthyen në ushqim të shëndetshëm, ndërsa të tjerët vazhduan dietën e pashëndetshme.
Rezultatet treguan se kafshët që kaluan në një dietë të shëndetshme përmirësuan performancën në testet e kujtesës.
Megjithatë, ky rikuperim u vu re kryesisht tek ato që kishin konsumuar dieta të pasura vetëm me yndyrna.
Tek kafshët që kishin konsumuar shumë sheqer, ose kombinim të lartë yndyrnash dhe sheqeri, problemet e kujtesës vazhduan edhe pas ndryshimit të dietës.
Sipas studiuesve, kjo sugjeron se sheqeri mund të shkaktojë ndryshime më të qëndrueshme në tru, ndoshta përmes rritjes së inflamacionit nervor.
Edhe pse nevojiten studime të tjera për ta konfirmuar këtë tek njerëzit, gjetjet përforcojnë rëndësinë e kufizimit të konsumit të sheqerit për të mbrojtur shëndetin e trurit në afat të gjatë. /Gazeta Shneta/