Pacientët që marrin trajtim me hemodializë në Qendrën Klinike Universitare të Kosovës (QKUK) do t’i kryejnë përkohësisht këto shërbime në qendra të tjera të hemodializës, për shkak të punimeve renovuese që kanë nisur në Qendrën e Hemodializës në kuadër të Klinikës së Nefrologjisë.
Klinika e Nefrologjisë ka bërë të ditur se zhvendosja e pacientëve është organizuar për të siguruar vazhdimësinë e trajtimit pa ndërprerje dhe për të ruajtur standardet e kujdesit shëndetësor gjatë periudhës së renovimeve, përcjell Gazeta Shneta.
Sipas njoftimit, pacientët janë sistemuar në qendrat e hemodializës më të afërta me vendbanimet e tyre, bazuar në planifikimin e stafit profesional dhe në koordinim me institucionet përkatëse shëndetësore.
Nga kjo klinikë, kanë theksuar se trajtimi i pacientëve do të vazhdojë normalisht dhe se janë ndërmarrë të gjitha masat për ofrimin e shërbimeve në mënyrë të sigurt dhe efikase.
Pas përfundimit të punimeve dhe krijimit të kushteve të reja për ofrimin e shërbimeve, aktiviteti i hemodializës do të rikthehet në Qendrën e Hemodializës në QKUK.
Klinika e Nefrologjisë ka falenderuar pacientët, familjarët dhe qytetarët për mirëkuptimin, bashkëpunimin dhe besimin e treguar gjatë kësaj periudhe./Gazeta Shneta/