Një seri testesh të kombinuara për COVID-19 dhe gripin janë futur në tregun evropian si produkte të manipuluara. Prodhuesi ka konfirmuar se seria me numër FCO24090516 është e falsifikuar.
Autoritetet portugeze kanë paralajmëruar Agjencinë Spanjolle për Barnat dhe Produktet Shëndetësore (AEMPS) për qarkullimin e këtyre testeve të vetëtestimit që pretendojnë të zbulojnë virusin e koronavirusit dhe gripin A+B.
Produkti origjinal është prodhuar nga “Safecare Biotech” në Hangzhou, Kinë, por njësitë e gjetura kanë numrin e serisë FCO24090516, që kompania e ka deklaruar si të falsifikuar, raporton Euronews Health transmeton Gazeta Shneta.
Edhe pse AEMPS ka nisur hetime për të gjurmuar shpërndarjen e testeve në Spanjë, deri tani nuk ka prova që këto njësi të kenë arritur në farmaci apo distributorë.
Ekzistojnë versione të ligjshme të të njëjtit test me referencë të ngjashme, gjë që e bën identifikimin e menjëhershëm më të vështirë.
Testet e falsifikuara kanë tre ndryshime të dukshme: etiketë me informacion të modifikuar (seri FCO24090516, datë prodhimi shtator 2024, skadimi shtator 2026), kaseta e testit dhe tubi i solucionit nuk kanë numër serie, dhe tamponi nuk përputhet me prodhuesin legjitim, i cili bashkëpunon me Dalian Rongbang Medical.
Autoritetet theksojnë se këto produkte duhet të blihen vetëm në farmaci, pasi jashtë tyre nuk ka garanci për origjinën, kushtet e ruajtjes apo këshillimin profesional. Nëse dikush ka një test të tillë në shtëpi, këshilla është e qartë: mos e përdorni.
Manipulimi i pajisjeve mjekësore është një problem serioz, pasi rezultatet e pasakta mund të çojnë në infeksione të pazbuluara ose trajtime të panevojshme. /Gazeta Shneta/