Një studim i botuar në “Journal of Breast Imaging”, tregon se shkalla e vdekshmërisë nga kanceri i gjirit nuk po bie më te gratë mbi 74 vjeç. Po ashtu, konfirmon se kjo shkallë kishte ndaluar rënien edhe te gratë nën 40 vjeç.
Kanceri i gjirit është shkaku i dytë kryesor i vdekjeve nga kanceri te gratë amerikane, duke shkaktuar mbi 42,000 vdekje në vitin 2024.
Para vitit 1990, shkalla e rasteve të kancerit të gjirit ishte në rritje, ndërsa vdekshmëria mbetej e lartë ose në rritje.
Teksa, pas vitit 1990, vdekshmëria nga ky lloj kanceri filloi të ulej në mënyrë të qëndrueshme, çka i atribuohet përdorimit të gjerë të mamografisë dhe përmirësimeve në trajtim.
Studiuesit Debra Monticciolo dhe R. Edward Hendrick analizuan të dhënat e vdekshmërisë nga kanceri të mbledhura nga Qendra Kombëtare për Statistikat e Shëndetit që prej vitit 1990.
Në përgjithësi, shkalla e vdekshmërisë nga kanceri i gjirit te gratë në SHBA ka rënë me 43.5% midis viteve 1990 dhe 2022.
Megjithatë, nga viti 2010 deri në 2022, kjo rënie ka qenë vetëm 1.23% në vit – ritmi më i ulët i regjistruar që nga viti 1990.
Për gratë amerikane të moshës 20–39 vjeç, vdekshmëria ra me 2.79% në vit deri në vitin 2010, por që nga ajo kohë ka mbetur e pandryshuar.
Studimi zbuloi se për gratë mbi 75 vjeç, vdekshmëria nga kanceri i gjirit ra me 1.26% në vit nga 1993 deri në 2013, por më pas ndaloi rënien.
Studiuesit zbuluan se fundi i rënies së vdekshmërisë lidhet kryesisht me rritjen e rasteve të kancerit të gjirit në stadin IV në momentin e diagnostikimit te gratë nën 40 vjeç dhe mbi 74 vjeç.
Kanceri i gjirit metastatik (stad i avancuar) ka një prognozë shumë të keqe, me një normë mbijetese 5-vjeçare prej vetëm 31%.
Ky studim sugjeron se rritja e rasteve të avancuara të kancerit të gjirit në momentin e diagnostikimit është një arsye kryesore pse shkalla e vdekshmërisë nuk po bie më me ritmin e mëparshëm. Studiuesit besojnë se kjo mund të lidhet me protokollet e kujdesit shëndetësor. /Gazeta Shneta/