Një regjim i ri trajtimi për pacientët me mielomë – një formë e kancerit të gjakut – ka treguar rezultate premtuese në zgjatjen e periudhës pa sëmundje (remisie) përmes një prove klinike të udhëhequr nga Universiteti i Leedsit.
Mieloma zakonisht trajtohet me transplant të qelizave burimore nga palca e kockave të vetë pacientit, i mbështetur me kimioterapi intensive. Megjithatë, sëmundja zakonisht rikthehet.
Në këtë studim, pacientët që kishin rikthim të mielomës iu nënshtruan një transplanti të dytë të qelizave burimore dhe më pas morën një kombinim barnash: talidomid, deksametazon dhe ixazomib—të cilat janë alternativa ndaj kimioterapisë tradicionale. Më pas, ixazomib përdorej si trajtim mirëmbajtës për të shtypur qelizat kancerogjene, shkruan MedicalXpress, transmeton Gazeta Shneta.
Rezultatet e provës klinike të quajtur Myeloma XII (ACCoRd), të publikuara në The Lancet Haematology, treguan se ky trajtim e zgjati remisien me mesatarisht 7 muaj krahasuar me trajtimin standard. Përveç zgjatjes së jetës pa sëmundje, pacientët përjetuan edhe përmirësim të cilësisë së jetës falë përdorimit të terapive më të buta dhe më të targetuara.
Studiuesit theksojnë se ky trajtim paraqet një alternativë të vlefshme për pacientët që janë në gjendje të kalojnë një transplant të dytë të palcës kockore. Organizata Cancer Research UK dhe profesionistë të përfshirë në këtë studim e konsiderojnë këtë si një hap të rëndësishëm drejt përmirësimit të trajtimeve për pacientët me mielomë./Gazeta Shneta/