Shërbimi Spitalor dhe Klinik Universitar i Kosovës ka reaguar pas publikimit të një kronike nga një medium vendor, e cila, sipas këtij institucioni, përmban pretendime të pavërteta dhe të pabazuara lidhur me gjendjen dhe funksionimin e Klinikës së Neurokirurgjisë në QKUK.
Në reagimin zyrtar, ShSKUK thekson se kronika në fjalë “nuk është e argumentuar me asnjë fakt apo material filmik dhe nuk qëndron në asnjë pjesë të përmbajtjes së saj”, duke shtuar se pretendimet e paraqitura janë të njëanshme, të pavërteta dhe të ndërtuara mbi deklaratat e një personi që nuk përfaqëson realitetin dhe as stafin aktual të klinikës”.
Sipas ShSKUK-së, personi që flet në kronikë është një ish-punonjëse e QKUK-së, ndaj së cilës ekziston një vendim i Gjykatës Themelore në Prishtinë për dënim me 6 muaj burgim, respektivisht me gjobë prej 2,500 euro, për keqpërdorim të detyrës zyrtare.
Në reagim theksohet se ndaj së njëjtës punonjëse janë ndërmarrë disa procedura disiplinore gjatë viteve të fundit, përfshirë hetime për përvetësim të materialeve kirurgjikale dhe sjellje joprofesionale.
Ajo është transferuar disa herë në klinika të ndryshme për shkak të parregullsive të konstatuara në punë, deri në vendimin përfundimtar të gjykatës më 21 gusht 2025.
QKUK, sqaron se personi që flet në kronikë, një ish-instrumentare, ka Vendim të Gjykatës Themelore në Prishtinë, është dënuar me 6 muaj burgim, apo gjobë materiale 2 mijë e 500 euro, për keqpërdorim të detyrës zyrtare, e poashtu, e përfshirë në disa raste të shkeljeve të rënda disiplinore dhe ligjore gjatë periudhës së saj në QKUK.
ShSKUK thekson se këto të dhëna janë të dokumentuara dhe të verifikueshme nga organet kompetente.
Në të njëjtin reagim, SHSKUK thekson se Klinika e Neurokirurgjisë mbetet një nga klinikat më të avancuara në vend, ku janë investuar miliona euro në pajisje moderne mjekësore, përfshirë mikroskopin neurokirurgjikal të gjeneratës së fundit dhe renovimin e plotë të bllokut operativ./Gazeta Shneta/
LEXO EDHE: