Një shtatzëni me rrezik të lartë nënkupton që ekziston një mundësi më e madhe për komplikime gjatë shtatzënisë, lindjes ose pas lindjes. Kjo nuk do të thotë domosdoshmërisht se do të ketë probleme, por kërkon vëmendje më të shtuar dhe monitorim më të afërt nga mjekët.
Ky klasifikim mund të ndodhë për disa arsye. Mund të lidhet me shëndetin e nënës, si sëmundje ekzistuese (p.sh. diabeti, tensioni i lartë, sëmundjet e zemrës apo veshkave), probleme të shëndetit mendor, apo faktorë si mosha (nën 20 ose mbi 40 vjeç), mbipesha, duhani, alkooli apo përdorimi i substancave të tjera.
Gjithashtu, edhe komplikacionet në shtatzëni të mëparshme, si lindje e parakohshme apo humbje e shtatzënisë, mund ta rrisin rrezikun.
Nga ana tjetër, edhe faktorë që lidhen me foshnjën mund të ndikojnë, si rritje jo normale gjatë kontrollit, shtatzëni me binjakë apo shenja që tregojnë për lindje të parakohshme.
Është e rëndësishme të kuptohet se rreziku në shtatzëni nuk është absolut dhe ndryshon nga një rast në tjetrin dhe mund të jetë më i lartë ose më i ulët në varësi të situatës.
Nëse shtatzënia konsiderohet me rrezik të lartë, kujdesi mjekësor zakonisht bëhet më intensiv. Kjo mund të përfshijë më shumë analiza gjaku, kontrolle më të shpeshta, ekzaminime me ultratinguj dhe ndjekje nga specialistë të veçantë.
Në disa raste, mund të nevojiten edhe medikamente ose monitorim i vazhdueshëm në spital, sidomos nëse ka probleme si tension i lartë apo rrezik për pre-eklampsi.
Rreziqet e mundshme ndryshojnë sipas rastit, por për nënën mund të përfshijnë mpiksje gjaku, probleme me veshkat ose mëlçinë, presion të lartë të gjakut apo diabet gestacional.
Për foshnjën, rreziqet mund të jenë rritje e pamjaftueshme ose e tepërt, lindje e parakohshme, probleme zhvillimore, apo nevojë për kujdes të specializuar pas lindjes.
Sa i përket lindjes, mënyra dhe koha e saj varen nga gjendja specifike e nënës dhe foshnjës. Në disa raste mund të rekomandohet nxitja e lindjes (induksioni), ndërsa në të tjera lindja me operacion cezarian, sidomos në situata të planifikuara ose emergjente.
Vendimi merret gjithmonë në bashkëpunim me mjekun, duke marrë parasysh sigurinë dhe preferencat e nënës.
Në përgjithësi, edhe pse një shtatzëni me rrezik të lartë kërkon më shumë kujdes, me monitorim të duhur dhe trajtim të specializuar, shumica e grave arrijnë të kenë një lindje të sigurt dhe foshnja të shëndetshme.
Ky tekst është marrë nga burimi Pregnancy Birth Baby dhe është përkthyer dhe redaktuar nga Gazeta Shneta.