Linea nigra është një vijë e errët që shfaqet në mes të barkut gjatë shtatzënisë, zakonisht nga kërthiza deri në zonën pubike. Ajo është një dukuri e zakonshme dhe e padëmshme, që nuk paraqet rrezik as për nënën dhe as për foshnjën, dhe nuk kërkon trajtim.
Kjo vijë zakonisht shfaqet në tremujorin e parë dhe shkaktohet nga ndryshimet hormonale që rrisin prodhimin e melaninës – pigmenti që i jep ngjyrë lëkurës.
Si rezultat, disa zona të trupit errësohen më shumë, veçanërisht tek personat me lëkurë më të errët. Linea nigra është në fakt errësimi i një strukture natyrale të quajtur linea alba, e cila lidh muskujt e barkut.
Linea nigra nuk shkakton simptoma dhe zakonisht zbehet pas lindjes, megjithëse tek disa gra mund të mos zhduket plotësisht.
Ekspozimi në diell mund ta bëjë më të dukshme, ndaj rekomandohet mbrojtja e barkut nga rrezet e diellit.
Nuk ka mënyrë të sigurt për ta parandaluar, por një dietë e pasur me acid folik (si perimet me gjethe jeshile, thjerrëzat dhe agrumet) mund të ndihmojë.
Gjithashtu, marrja e suplementeve me acid folik para dhe gjatë fillimit të shtatzënisë është e rëndësishme për shëndetin e foshnjës.
Nëse vëreni ndryshime të tjera në lëkurë ose njolla të pazakonta, këshillohuni me mjekun për vlerësim të mëtejshëm.
Ky tekst është marrë nga burimi Pregnancy Birth Baby dhe është përkthyer dhe redaktuar nga Gazeta Shneta.