Në SHBA, disa spitale po përdorin robotë për të lehtësuar vuajtjet e pacientëve të vegjël dhe të moshuarve. Me integrimin e inteligjencës artificiale (IA) në jetën e përditshme, po zgjerohet edhe roli i saj në kujdesin shëndetësor.
Në një spital fëmijësh në Masaçusets, një robot terapeutik i quajtur Robin viziton pacientët e vegjël. Me trup 1.2 metra dhe formë të përshtatur për përqafime, Robin është programuar të sillet si një vajzë 7-vjeçare, duke ofruar shoqëri, argëtim dhe mbështetje emocionale për fëmijët që përballen me procedura të dhimbshme.
“Qëllimi kryesor është të ofrojmë ngushëllim dhe të lehtësojmë qëndrimin në spital,” thekson Karén Khachikyan, drejtues i kompanisë Expper Technologies.
Shembujt praktikë tregojnë ndikimin e tij. Kur një djalë i vogël kishte nevojë për një venozë, Robin i tregoi një vizatim ku vetë i nënshtrohej të njëjtës procedurë, duke e bërë procesin më të pranueshëm.
Që nga viti 2020, Robin është pjesë e ekipit të UMass Memorial Children’s Medical Center dhe sot ndodhet në rreth 30 qendra shëndetësore në SHBA. Përdorimi është zgjeruar edhe në kujdesin ndaj të moshuarve, ku roboti ndihmon me ushtrime frymëmarrjeje, lojëra kujtese dhe shoqëri.
Edhe pse funksionon me IA, Robin kryen vetëm 30% të detyrave në mënyrë autonome, ndërsa pjesa tjetër kontrollohet nga operatorë në distancë. Synimi është që roboti të lehtësojë mungesën e stafit, pa e zëvendësuar atë. Planet për të ardhmen përfshijnë matjen e shenjave vitale dhe mbështetje praktike për të moshuarit në përditshmëri. /Gazeta Shneta/