Rreth 740 milionë njerëz në mbarë botën vuajnë nga tinitusi.
Edhe pse nuk ka një kurë për këtë gjendje, studimet e mëparshme tregojnë se ka mënyra për të ulur rrezikun e zhvillimit të saj, përfshirë ndjekjen e një diete të shëndetshme, shkruan burimi Medical News Today përcjell Gazeta Shneta.
Një studim i ri raporton se rritja e konsumit të frutave, fibrave, produkteve të bulmetit dhe kafeinës mund të ndihmojë në uljen e rrezikut për tinitusin.
Tinitusi është një gjendje kronike e dëgjimit, ku një person dëgjon vazhdimisht tinguj shqetësues në njërin ose të dy veshët. Zakonisht, ai përshkruhet si një “zhurmë kumbimi në veshë”.
Ekzistojnë disa shkaqe të mundshme të tinitusit, përfshirë humbjen e dëgjimit, infeksionet e veshit, problemet me tiroiden dhe një gjendje të veshit të brendshëm të quajtur sëmundja e Meniere-it.
Aktualisht nuk ka një trajtim përfundimtar për tinitusin. Megjithatë, studimet e mëparshme sugjerojnë se disa masa mund të ndihmojnë në uljen e rrezikut, si mbrojtja e dëgjimit nga zhurmat e larta (si muzika në koncerte ose përdorimi i veglave elektrike), menaxhimi i stresit, gjumi i mjaftueshëm dhe mbajtja e presionit të gjakut dhe niveleve të kolesterolit në kufij normal.
Kërkimet e mëparshme kanë shqyrtuar gjithashtu ndikimin e dietës së shëndetshme në rrezikun për tinitusin. Për shembull, një studim i botuar në shkurt 2020 tregoi se një konsum më i lartë i vitaminës B12 dhe një dietë e pasur me proteina mund të ndihmojnë në uljen e këtij rreziku.
Po ashtu, një studim i publikuar në dhjetor 2024 zbuloi se konsumimi i tonit, peshkut me mish të bardhë dhe frutave të detit lidhej me një rrezik më të ulët për zhvillimin e tinitusit të vazhdueshëm te gratë.
Tani, një studim i ri i botuar së fundmi në revistën “BMJ Open”, raporton se rritja e niveleve të frutave, fibrave, produkteve të bulmetit dhe kafeinës në dietë mund të ndihmojë në uljen e rrezikut për tinitusin. /Gazeta Shneta/