Është ajo kohë e vitit kur viruset e frymëmarrjes fillojnë të qarkullojnë gjerësisht, por si mund të dalloni simptomat e një ftohjeje, gripi dhe COVID-19?
Dr. William Brian Glenn, nga “Hackensack Meridian Medical Group”, në Nju Xhersi, ndan informatat që duhet të dini për të qenë gati për çfarëdo virusi që ju del këtë vjeshtë dhe dimër, shkruan Health Day përcjell Gazeta Shneta.
Sfida me ftohjen, gripin dhe COVID-19 është se simptomat për secilin janë të ngjashme, vuri në dukje Dr. Glenn.
Ftohja mund të shfaqet si kollë, teshtitje, sekrecione të hundës, dhimbje të fytit dhe lodhje, ndërsa gripi mund të përfshijë të gjitha këto simptoma plus dhimbje koke, ethe, të dridhura, dhimbje trupi dhe lodhje.
Ndërkohë, COVID mund të shfaqet me simptoma të ftohjes dhe gripit, së bashku me një humbje të shijes ose nuhatjes, diarre, të përziera dhe të vjella ose gulçim, tha Dr. Glenn.
Simptomat e ftohjes priren të shfaqen gradualisht, ndërsa simptomat e gripit shfaqen papritur. Simptomat e COVID zgjasin nga dy deri në 14 ditë pas ekspozimit dhe mund të përparojnë në simptoma më të rënda tek disa njerëz.
Të moshuarit, fëmijët dhe individët me sëmundje kronike, duke përfshirë diabetin, sëmundjet e mushkërive ose veshkave, çrregullimet metabolike, sëmundjet e zemrës dhe kancerin janë më të ndjeshëm ndaj infeksioneve të frymëmarrjes. Marrja e disa ilaçeve që dobësojnë sistemin imunitar mund t’i vendosë njerëzit në një rrezik më të lartë për këto sëmundje, shtoi Dr. Glenn.
Për t’u mbrojtur nga të gjitha këto viruse, lani shpesh duart, mbuloni gojën kur kolliteni, teshtitni në shpatull, përdorni maskë kur është e përshtatshme, pastroni rregullisht sipërfaqet e prekura shumë (banakët, dorezat e dyerve dhe dorezat e tualetit). /Gazeta Shneta/