Mosha 4 vjeçare është një periudhë ku fëmijët krijojnë shumë fobi, herë nga një gjë, herë nga një gjë tjetër. Ndoshta mund të ketë edhe komponentë të trashëguar në ankthin që ndjen fëmija, prandaj frika e tij nuk është shumë befasuese.
Ajo që duhet të bëjë prindi në këtë rast është të zvogëlojë intensitetin emocional që nxisin shqetësimet si tek fëmija edhe tek vetë prindi. Sa më shumë problem ta bëni frikën e tij, aq më shumë do t’ja shtoni pasigurinë. Mos kaloni nga refuzimi për ta shoqëruar në banjë, në sjellje shumë mbrojtëse kur ai ndihet i shqetësuar. Një zgjidhje e mesme do të ishte më e mira.
Mbani një qëndrim miqësor ndaj fëmijës. Për shembull ju mund ta shoqëroni për në tualet, por gjatë rrugës t’i thoni se nuk ka asgjë për t’u frikësuar, kështu që ju po qëndroni pas derës për ta pritur. Mundohuni që të gjeni një kompromis që fëmija të ndihet rehat dhe dalëngadalë të eleminojë frikën.
Nëse nuk doni që fëmija të flejë në dhomën tuaj të gjumit, mund të shkoni ju në dhomën e tij. Qëndroni deri sa ta ketë zënë gjumi. Mund ta vendosni në shtrat dhe vetë të qëndroni ulur në një karrige pranë./pernenat