S’ka proteza për viktimat e minave në Kosovë

2017-04-06 në ora 07:36

Që nga paslufta 116 kosovarë kanë humbur jetën nga minat, ndërsa 454 të tjerë kanë marrë lëndime dhe shumë të tjerë kanë humbur edhe gjymtyrët e trupit. Shteti i Kosovës nuk kujdeset që t’ua sigurojë protezat atyre që pësuan nga shpërthimi i minave.

Çdo katër vjet kërkohet ta ndërrojnë protezën, përderisa ata që humbën gjymtyrët e trupit nga minat që nga paslufta i mbajnë ato të vendosura para 16 vjetësh.

Ndihmën sociale që marrin nga shteti si pension invalidor nuk tejkalon vlerën e 150 eurove e një protezë prej më të thjeshtave kushton hiç më pak se 3500 euro.

Që nga paslufta 116 kosovarë kanë humbur jetën nga minat, 454 kanë marrë lëndime dhe të tjerë kanë humbur gjymtyrët e trupit si: sytë, duart e këmbët.

Shoqata e të Plagosurve Civilë nga Minat (SHPCM) ka dërguar me dhjetëra kërkesa në adresë të institucioneve të vendit.

Asnjëherë deri më tani nuk janë përkrahur për t’ua mbuluar shpenzimet e protezave, shkruan Gazeta “Zëri”.

Në anën tjetër raportohet se në Kosovë ekzistojnë edhe 111 zona të afektuara nga minat dhe mjetet tjera eksplozive të pashpërthyera.

Kristë Prenaj rrëfen për “Zërin” se mban ende protezën e vënë para 16 vjetësh në pamundësi që të vendosë një të re.