Qindra pacientë mund të jenë rrezikuar nga një gabim i drejtorit të Radiologjisë në QKUK për sasinë e injektimit të kontrastit në kabinetin e Rezonancës Magnetike. Kjo gjendje është alarmuar nga specialistët dhe prodhuesi amerikan “GE Healthcare” i kontrastit ‘Clariscan’
Në gusht të këtij viti drejtori i Klinikës së Radiologjisë në QKUK Dr. Bujar Gjikolli me një letër zyrtare ku është njoftuar edhe drejtori i SHSKUK-së, ka vendosur principet bazë të aplikimit të kontrastit paramagnetik sipas peshës trupore për kabinetin e Rezonancës Magnetike.
Në bazë të tabelës së vendosur nga Gjikolli, specialistëve në MRI iu kërkohet që të aplikojnë 1ml kontrast për 10 kg peshë trupore deri 10 ml për 100 kg peshë trupore. “Minimumi i sasisë së kontrastit paramagnetik të aplikuar është: 0.1 ml kontrast për 1 kg peshë trupore”, thuhet në këtë vendim të Gjikollit, shkruan Gazeta Shneta.
Ky veprim po konsiderohet si i gabueshëm profesionalisht dhe skandaloz për faktin se mund të ketë shkaktuar rrezik për shëndetin e pacientëve që kanë kryer rezonancë me këto principe. Gjendjen e kanë alarmuar edhe specialistët e radiologjisë të cilët nuk dëshirojnë të dalin publikisht, ndërsa me një letër zyrtare përgjegjësi ka kërkuar prodhuesi i kontrastit kompania e njohur amerikane “General Eletric Healthcare”.
GE i ka dërguar një letër menaxhmentit dhe Bordit të SHSKUK-së më 16 tetor ku kërkohet të shqyrtohet rasti principeve për kontrastin ‘Clariscan’ të vendosura në Radiologji të cilat nuk janë në përputhje me protokollet e aprovuara nga prodhuesi dhe Agjencia Evropiane e Barnave (EMA).
“Kjo rrezikon direkt jetën e pacientëve dhe duhet raportuar në Departamentin e Farmakovigjilencës në AKPPM, pasi QKUK të na siguroj të dhënat se tek sa pacient është zbatuar ky protokoll dhe cilat kanë qenë pasojat”, thuhet në këtë letër. Tutje aty përmendet edhe shqetësimi i ngritur nga specialistët e radiologjisë të cilët kanë njoftuar prodhuesin.
“Çështja ka të bëjë me sasinë që duhet ordinuar tek pacientët për të marr informacion diagnostik. Doza që duhet administruar sipas Fletudhëzimit të barit (e aprovuar nga EMA) për këtë kontrast është: 0.1mmol/kg peshë trupore që në ml është 0.2 ml për peshë trupore. Vërejtje: tabela e aprovuar si protokoll në Klinikën e Radiologjisë dhe e vendosur në kabinet për t’u respektuar nga mjekët është 50 % nën dozën e aprovuar nga EMA për këtë produkt medicinal”, thuhet në letrën e GE-së.
Në letër tutje tërhiqet vërejtja se në principet e vendosura nga Gjikolli thuhet se për personat me sklerozë multiple doza e kontrastit mund të dyfishohet. Kjo sipas prodhuesit është në kundërshtim me udhëzimin e produktit të aprovuar nga EMA.
“GE Healthcare shfaq shqetësimin për administrimin gabim tek pacientët duke e vlerësuar si një gabim mjekësor të rëndë dhe jo etik që rrezikon jetën e pacientëve”, thuhet në fund të letrës.
Gazeta ka pritur më shumë se dy javë për një përgjigje nga SHSKUK dhe drejtori i Radiologjisë Bujar Gjikolli. Asnjëra palë nuk kanë dhënë sqarime që nga data 10 dhjetor. Gazeta ka kërkuar nga Gjikolli të tregoj se ku është bazuar për principet e vendosura për injektimin e kontrastit, nga kush janë miratuar këto principe dhe nëse ka pasur komision për vendosjen e tyre. Për asnjërën nga këto pyetje Gazeta nuk ka marr përgjigje nga Gjikolli. /Gazeta Shneta/