Për skandalin e foshnjës në Spitalin e Pejës janë shkarkuar drejtori mjekësor dhe drejtori për infermieri.
Kështu ka bërë të ditur Spitali i Pejës në një postim në Facebook ku është thënë se drejtori Fazli Shala i ka shkarkuar drejtorin mjekësor dhe drejtorin për infermieri, shkruan Gazeta Shneta.
“Në kuadër të masave lidhur me rastin e trajtimit të frytit të vdekur në Spitalin e Përgjithshëm në Pejë. Drejtori Ekzekutiv ka shkarkuar Drejtorin Mjekësor dhe Drejtorin për Infermieri. Shkarkimi është bërë si përgjegjësi direkte menaxheriale lidhur me rastin e frytit të vdekur”, thuhet në njoftim.
Këto dy pozita janë mbajtur nga Muhamet Halitaj, drejtor mjekësor; si dhe Hidajete Krasniqi, drejtor për infermieri.
Më 13 dhjetor një nënë kishte lindur foshnjën pa shenja jete në javën e 32-të. Trupi i pajetë i foshnjës ishte vendosur në një dhomë në repartin e gjinekologjisë, kurse të nesërmen ishte ngatërruar me çarçafë dhe ishte futur në rrobalarëse.
Për këtë skandal kishte qenë në dijeni edhe drejtoria e SHSKUK-së por nuk u bë publike deri pas tetë ditësh kur babai i foshnjës vendosi të dal me një rrëfim në media.
Deri më tani për këtë rast janë shkarkuar katër mami dhe tri punonjëse të pastrimit në spitalin e pejës, si dhe ud.kryeinspektori Shaban Osmanaj, derisa nuk ka pasur asnjë reagim nga SHSKUK. /Gazeta Shneta/