Infermierët e Klinikës së Gjinekologjisë kanë dal me një letër drejtuar instancave udhëheqëse në SHSKUK dhe MSH, duke kundërshtuar një risistemim që ka ndodhur para disa javësh nga menaxhmenti i klinikës e cila udhëhiqet nga Zef Ndrejaj.
Rreth 150 infermierëve të reparteve në Klinikën e Gjinekologjisë iu janë ndërruar vendet e punës. Kjo po konsiderohet se është në kundërshtim me Ligjin e Punës, shkruan Gazeta Shneta.
Së paku kështu thuhet në një letër ankese e cila është nënshkruar nga infermierët dhe e njëjta është deponuar në Komisionin e Ankesave në SHSKUK.
“Është fakt i pakontestueshëm se Ligjin nr. 03/L-2022 i punës ka përcaktuar dispozita të veçanta në lidhje me procesin e sistemimit të punësuarve nga ana e punëdhënësit, që në rastin tonë konkret nuk është bërë asnjë veprim në përputhje me këto dispozita”, thuhet në këtë ankesë.
Infermierët kanë kërkuar që risistemimi i tyre të bëhet konform kontratës së punës, aktit të brendshëm dhe dispozitave të Ligjit të Punës.
Ndryshe këtë risistemim ata e kanë konsideruar si degradim dhe dëmtim të imazhit të infermierëve të klinikës.
Gazeta për këtë çështje ka kërkuar sqarime më 5 dhjetor nga drejtoria e SHSKUK-së dhe drejtori i Klinikës Zef Ndrejaj, por asnjëra palë nuk ka kthyer përgjigje. /Gazeta Shneta/
