Njerëzit me çrregullime psikotike si skizofrenia kanë 2.5 herë më shumë gjasa që të zhvillojnë përfundimisht demencën, sipas një rishikimi të provave të udhëhequr nga studiuesit e UCL.
Rishikimi i ri sistematik dhe meta-analiza, botuar në ‘Psychological Medicine’, zbuloi se çrregullimet psikotike mund të kenë një lidhje më të fortë me demencën sesa çrregullimet e tjera të shëndetit mendor si depresioni ose ankthi, shkruan Medical Xpress përcjell Gazeta Shneta.
Autori i studimit, Dr. Jean Stafford tha se: “Ne zbuluam se diagnoza e një çrregullimi psikotik lidhet me një rrezik shumë më të lartë të zhvillimit të demencës më vonë në jetë.
“Gjetjet tona shtojnë provat se mbrojtja e shëndetit mendor të njerëzve gjatë gjithë jetës mund të ndihmojë në parandalimin e demencës.”
Studimi është rishikimi i parë sistematik me cilësi të lartë që shikon një sërë çrregullimesh psikotike dhe lidhjen e tyre me rrezikun e demencës.
Skizofrenia dhe çrregullimet e tjera psikotike të lidhura me to janë sëmundje të rënda që përfshijnë simptoma të tilla si halucinacione dhe deluzione si dhe tërheqje sociale.
Shumë njerëz përjetojnë gjithashtu dëmtime në aftësitë njohëse dhe funksionale.
Studiuesit mblodhën së bashku prova nga 11 studime nga nëntë vende në katër kontinente, të cilat përfshinin rreth 13 milionë pjesëmarrës në total.
“Njerëzit me çrregullime psikotike kanë më shumë gjasa të kenë kushte të tjera shëndetësore, si sëmundje kardiovaskulare ose obezitet, të cilat mund të rrisin rrezikun e demencës, ndërkohë që ata gjithashtu kanë më shumë gjasa të kenë një dietë të dobët, të jenë përdorues të duhanit apo drogës të cilat mund të dëmtojnë shëndetin e tyre në mënyra që mund të rrisin gjasat e tyre për të zhvilluar demencë.”
“Meqenëse njerëzit me çrregullime psikotike përballen me një rrezik më të lartë të shumë kushteve të tjera shëndetësore, menaxhimi i shëndetit të tyre të përgjithshëm fizik dhe mendor është shumë i rëndësishëm dhe këtu kemi zbuluar se profesionistët shëndetësorë që punojnë me ta duhet gjithashtu të jenë vigjilentë për çdo shenjë të rënies së aftësisë njohëse” thanë autorët. /Gazeta Shneta/