Spitali i Pejës ka bërë një përpjekje për të demantuar Gazetën Shneta lidhur me raportimin për prishjen e rezonancës magnetike e cila po hetohet edhe nga Prokuroria Themelore në Pejë. Ky spital dje e ka shpërblyer kompaninë “Medbrand” me kontratë 170 mijë euro për servisimin e pajisjes, por rezonanca do të vazhdojë të qëndrojë e prishur derisa SHSKUK të inicioj kontratë për rregullimin e saj. Spitali nuk ka sqaruar se çfarë do të servisoj kompania “Medbrand”
Spitali i Përgjithshëm i Pejës ka dal me një përpjekje për të demantuar Gazetën Shneta në raportimin e saj për prishjen e rezonancës magnetike. Gazeta ka raportuar ditë më parë për hetimet që po i zhvillon Prokuroria Themelore në Pejë për prishjen e kësaj pajisje, e cila dyshohet të mos ketë ndodhur rastësisht.
Ndërkohë dje ky spital e ka shpërblyer kompaninië “Medbrand” për servisimin e pajisjes. Kontrata në vlerë 170 mijë euro sipas këtij spitali do të jetë për servisimin dhe mirëmbajtjen në periudhën 2 vjeçare, dhe jo për rregullimin e defektit që ka ndodhur më 30 mars.
Në reagimin që ka bërë spitali thuhet se do të presin nga SHSKUK që të iniciojë një kontratë tjetër për rregullimin e pajisjes. E Gazeta sërish ka kërkuar sqarime nga spitali se pse është dhënë kontrata për servisimin 2 vjeçar, nëse pajisja do të vazhdojë të jetë jashtë funksionit. Por edhe për këtë çështje spitali nuk ka kthyer përgjigje.
“Servisimi pra riparimi i defektit aktual në Rezonancën Magnetike do të bëhet me procedurë tjetër në kuadër të kontratave që ka SHSKUK-ja dhe lajmi i dhënë që aludon që një kompanie po i jipen 170 mijë euro për servisim të Rezonancës nuk qëndron”, thuhet në reagimin e spitalit.
Reagimi i plotë nga Spitali dhe përgjigjja nga redaksia e Gazetës Shneta:
Spitali i Përgjithshëm në Pejë sqaron se publikimi i bërë nga Gazeta Shneta lidhur me “nënshkrimin e një kontrate për riparim të rezonancës magnetike në vlerë prej 170 mijë euro” nuk përfaqëson saktë natyrën dhe përmbajtjen e ptocedures tenderuese në fjalë.
Në realitet, Spitali ka shpallur këtë tender për mirëmbajtje të regulltë para se të vjen tek defekti i Rezonancës Magnetike. Me këtë kontratë synohet mirëmbajtja dhe servisimi i rezonancës magnetike për një periudhë 2-vjeçare, në përputhje me rregullat e prokurimit publik. Kjo kontratë mbulon shërbime të rregullta të mirëmbajtjes preventive dhe intervenime teknike të nevojshme gjatë gjithë kësaj periudhe.
Nuk bëhet fjalë për një riparim të vetëm në vlerë prej 170 mijë eurosh, por është për shërbim të vazhdueshëm teknik të kontraktuar për 24 muaj, i cili ka për qëllim të garantojë funksionimin e sigurt dhe efikas të pajisjes gjatë gjithë kohës.
Servisimi pra riparimi i defektit aktual në Rezonancën Magnetike do të bëhet me procedurë tjetër në kuadër të kontratave që ka SHSKUK-ja dhe lajmi i dhënë që aludon që një kompanie po i jipen 170 mijë euro për servisim të Rezonancës nuk qëndron.
Për korrektësi publike dhe profesionale, ftojmë Gazetën Shneta që të rishikojë dhe korrigjojë raportimin e bërë, dhe i inkurajojmë të gjitha mediat që për çështje që kanë të bëjnë me Institucionin tonë, të na kontaktojnë zyrtarisht për informata të sakta. Besojmë se jemi të dëshmuar për bashkëpunim të hapur dhe pa vonesa me media.
Përgjigje nga redaksia e Gazetës Shneta:
Gazeta Shneta fillimisht ka raportuar për prishjen e Rezonancës Magnetike në Spitalin e Pejës, e më pas edhe për dhënien e kontratës për servisimin e saj.
Në artikullin e dytë për servisimin e pajisjes, së cilit i referohet spitali i Pejës në reagim, Gazeta Shneta asnjëherë nuk ka thënë se kontrata në vlerë 170 mijë euro është dhënë për ripartimin e defektit, por për servisimin e pajisjes ashtu edhe sikurse përshkruhet në titullin e kontratës.
Për këtë çështje redaksia i ka dërguar spitalit pyetje më datën 29 prill por të njëjtit nuk kanë kthyer përgjigje asnjëherë.
Linku i artikullit pa ndërhyrje e gjeni këtu:
Por reagimi i Spitalit ngre në pikëpyetje një çështje tjetër.
Gjëja që do të duhej të sqaronte menaxhmenti i Spitalit të Pejës është se pse është dhënë tenderi për servisim dhe mirëmbajtje 2 vjeçare, ndërkohë që pajisja është jashtë funksionit. Pra çfarë do të mirëmbajë dhe servisojë kompania “Medbrand” së cilës i është dhënë kontrata 170 mijë euro. Edhe për këtë çështje Gazeta e ka pyetur spitalin, por as në këtë rast nuk ka ofruar përgjigje.