Statinat njihen gjerësisht për rolin e tyre në uljen e kolesterolit dhe parandalimin e sëmundjeve kardiovaskulare, por studimet e fundit sugjerojnë se këto barna mund të ofrojnë edhe përfitime të rëndësishme për shëndetin e trurit.
Studime të reja po hedhin dritë mbi potencialin e statinave në uljen e rrezikut për sëmundje neurodegjenerative, përfshirë Alzheimerin dhe demencën.
Një meta-analizë e kryer në Brazil, e bazuar në të dhënat e 55 studimeve vëzhguese që përfshinë mbi 7 milionë pacientë, zbuloi se përdorimi i statinave lidhej me një rrezik dukshëm më të ulët për zhvillimin e demencës dhe sëmundjes së Alzheimerit, shkruan burimi Very Well Health transmeton Gazeta Shneta.
Sipas autorit kryesor të studimit, Fernando Luiz Westphal Filho, pedagog në Universitetin Federal të Neurologjisë në Brazil, është ende herët që statinat të rekomandohen vetëm për parandalimin e demencës.
Megjithatë, ai theksoi se përfitimet e mundshme, së bashku me përdorimin e gjerë dhe përballueshmërinë e tyre, nënvizojnë nevojën për kërkime të mëtejshme mbi rolin mbrojtës të këtyre barnave ndaj trurit.
Rezultatet treguan se personat që kishin përdorur statina për të paktën tre vjet përjetuan një ulje prej rreth 63% të rrezikut për zhvillimin e demencës, duke sugjeruar se përdorimi afatgjatë mund të jetë kyç për mbrojtjen e funksioneve njohëse.
Shoqata Amerikane e Zemrës ka theksuar vazhdimisht lidhjen e ngushtë mes shëndetit të zemrës dhe atij të trurit, pasi problemet kardiovaskulare dhe hipertensioni mund të dëmtojnë qarkullimin e gjakut dhe funksionin kognitiv.
Statinat, duke ulur kolesterolin, përmirësuar rrjedhjen e gjakut dhe reduktuar inflamacionin, mund të ndihmojnë në mbrojtjen e qelizave nervore dhe në pastrimin e pllakave amiloide që lidhen me Alzheimerin, duke ofruar një perspektivë të re në parandalimin e sëmundjeve neurodegjenerative. /Gazeta Shneta/