Grelina është hormoni përgjegjës për stimulimin e oreksit dhe rritjen e ndjesisë së urisë.
Nivelet e larta të këtij hormoni shpesh e bëjnë më të vështirë humbjen e peshës, ndërsa disa gjendje shëndetësore – si tiroiditi i Hashimotos, sindroma Prader-Willi, anoreksia dhe bulimia nervore – shoqërohen me rritje të grelinës, shkruan Medical News Today transmeton Gazeta Shneta.
Hulumtimet e mëparshme kanë treguar se aktiviteti fizik mund të ndikojë në uljen e niveleve të këtij hormoni.
Një studim i ri nga Universiteti i Virxhinias, i publikuar në “Journal of the Endocrine Society”, ka zbuluar se ushtrimet intensive janë më efektive në shtypjen e grelinës sesa ushtrimet me intensitet të moderuar.
Sipas studiuesve, kur kryhen ushtrime të forta, trupi përgjigjet duke ulur më shumë aktivitetin e grelinës, gjë që ndihmon në kontrollin e oreksit.
Ky mekanizëm mund të shpjegojë pse disa persona arrijnë rezultate më të mira në menaxhimin e peshës kur ndjekin programe të strukturuara stërvitjeje me intensitet të lartë.
Megjithatë, ekspertët theksojnë se çdo formë ushtrimi ka përfitime të rëndësishme për shëndetin, ndaj zgjedhja e aktivitetit duhet të përshtatet me gjendjen fizike dhe qëndrueshmërinë afatgjatë të individit. /Gazeta Shneta/