Një studim i udhëhequr nga Universiteti i Shkencave Shëndetësore të Teksasit (UT Health San Antonio), bazuar në të dhënat e studimit të gjatë Framingham Heart Study, ka zbuluar se nivelet e larta të kortizolit (hormoni i stresit) në mesin e jetës janë të lidhura me rritjen e depozitimit të proteinës amiloide në tru – një shenjë e hershme e sëmundjes së Alzheimerit – te gratë pas menopauzës.
Studiuesit analizuan të dhënat e 305 pjesëmarrësve pa dëmtime mendore, me një moshë mesatare 39.6 vjeç, dhe i ndoqën për 15 vite. Ata përdorën imazheri PET për të matur depozitimin e proteinave amiloide dhe tau, të cilat lidhen me Alzheimerin. U vërejt se vetëm te gratë postmenopauzë, nivelet e larta të kortizolit në mesin e jetës ishin të lidhura me rritje të proteinës amiloide në tru. Tek meshkujt nuk u vërejt lidhje e tillë.
Kjo sugjeron se ndikimi i kortizolit mund të jetë më i dëmshëm pas menopauzës, kur bie mbrojtja hormonale e estrogjenit dhe testosteronit, shkruan MedicalXpress transmeton Gazeta Shneta.
Sipas autorëve të studimit, përfshirë Dr. Arash Salardini dhe Dr. Sudha Seshadri, këto rezultate theksojnë rëndësinë e zbulimit të hershëm të faktorëve të rrezikut, para se të shfaqen simptomat e Alzheimerit. Ata propozojnë se ulja e stresit dhe ndërhyrjet hormonale mund të jenë strategji premtuese për parandalimin e Alzheimerit te gratë me rrezik të lartë.
Ky studim nënvizon rëndësinë e seksit dhe statusit hormonal në kuptimin e zhvillimit të sëmundjes së Alzheimerit dhe nevojën për më shumë kërkime për të kuptuar rolin e kortizolit në këtë proces./ Gazeta Shneta/