Ndërsa beteja mbi abortin vazhdon të shpërthejë në gjykata dhe politikën amerikane, një raport i ri vlerëson se një në çdo katër gra amerikane do t’i nënshtrohet procedurës gjatë jetës së tyre.
Studimi u botua nga Instituti Guttmacher, një organizatë kërkimore dhe politikash e fokusuar në shëndetin seksual dhe riprodhues që mbështet aksesin në abort, shkruan burimi Health Day përcjell Gazeta Shneta.
Studiuesit anketuan afro 6700 gra amerikane që kishin akses në kujdesin klinik të abortit në 56 objekte jo-spitalore në 21 shtete midis qershorit 2021 dhe korrikut 2022.
Mes tjerash, studiuesit e Institutit Guttmacher zbuluan se gratë 20-24-vjeçare kishin shkallën më të lartë të aborteve (32.7 aborte për 1000).
Ky sondazh nuk përfshiu gratë që menaxhonin abortet e tyre jashtë sistemit formal të kujdesit shëndetësor.
Statistikat që tregojnë se një e katërta e grave do t’i nënshtrohen një aborti “konfirmon atë që ne tashmë e dimë: aborti është një pjesë normale e jetës riprodhuese të njerëzve me aftësinë për të mbetur shtatzënë,” tha Rachel Jones, shkencëtare kryesore kërkimore në Guttmacher.
“Ndalimet dhe kufizimet janë krijuar për të stigmatizuar abortin, por studimi ynë tregon se një në katër gra pritet të abortojë gjatë jetës së tyre,” tha ajo. “Kjo do të thotë se pothuajse të gjithë, përfshirë kundërshtarët e abortit, njohin dikë që ka pasur një abort…”.
Të dhëna të tjera nga raporti:
– Adoleshentët e moshës 15 deri në 17 vjeç kishin shkallën më të ulët të aborteve, 2.1 për 1000 raste.
– 58% e të gjitha grave të anketuara thanë se ky ishte aborti i tyre i parë.
– 57%–59% e grave në të 30-at dhe 40-at që u anketuan thanë se ky nuk ishte aborti i tyre i parë.
– 13% e grave mund të pritet që të abortojnë deri në moshën 25 vjeçare.
Një tjetër raport i fundit i Guttmacher zbuloi se midis 2020 dhe 2023, normat e abortit u rritën me rreth 10%, gjë që mund të rrisë edhe më shumë përqindjen e grave që abortojnë gjatë jetës së tyre.
Raporti u publikua së fundmi në revistën “Contraception”.