Edhe pse aspirina me doza të ulëta nuk rekomandohet më gjerësisht për parandalimin e sëmundjeve të zemrës, një studim i ri sugjeron se ajo mund të sjellë përfitime për personat me diabet të tipit 2.
Studiuesit zbuluan se të rriturit me diabet që merrnin aspirinë kishin më pak raste infarkti, goditjeje cerebrale dhe vdekjesh gjatë një periudhe 10-vjeçare krahasuar me ata që nuk e përdornin, shkruan burimi Health Day transmeton Gazeta Shneta.
Sipas Dr. Aleesha Kainat nga Universiteti i Pittsburgh, përfitimi ishte më i madh tek ata që e përdornin aspirinën në mënyrë të rregullt.
Në analizën e gati 11,700 të rriturve me diabet dhe me rrezik të lartë kardiovaskular, ata që përdornin aspirin kishin 42% kundrejt 61% incidencë të infarktit dhe 15% kundrejt 25% incidencë të goditjeve në tru.
Shkalla e përgjithshme e vdekshmërisë ishte 33% tek përdoruesit e aspirinës dhe 51% tek ata që nuk e merrnin.
Megjithatë, studimi përjashtoi personat me rrezik të lartë për gjakderdhje dhe nuk analizoi efektet anësore, duke theksuar nevojën për kujdes në interpretim. Aspirina dihet se rrit rrezikun e gjakderdhjes për shkak të efektit hollues në gjak.
Ekspertët e AHA theksojnë se edhe pse aspirina mund të sjellë përfitime te disa pacientë me diabet, ajo nuk rekomandohet për parandalim të përgjithshëm dhe çdo vendim duhet marrë në bashkëpunim me mjekun, duke peshuar rrezikun dhe përfitimin individual.
Ky studim hap rrugën për kërkime të reja mbi mënyrën më të sigurt për të balancuar rrezikun e gjakderdhjes me mbrojtjen kardiake te pacientët diabetikë. /Gazeta Shneta/