Heqja e fluoridit nga uji i pijshëm mund të çojë në rritje të rasteve të prishjes së dhëmbëve tek fëmijët dhe në kosto më të larta për sistemin shëndetësor, paralajmëron një analizë e re.
Sipas studimit, nëse disa shtete ndalojnë shtimin e fluoridit në ujë, mbi 132 mijë fëmijë shtesë mund të kenë nevojë për trajtim dentar brenda tre viteve të ardhshme, përfshirë mbushje apo nxjerrje të dhëmbëve.
Analiza, e realizuar nga CareQuest Institute for Oral Health, vlerëson se kostot shtesë për programin Medicaid mund të arrijnë deri në 40 milionë dollarë. Studimi është fokusuar në pesë shtete amerikane: Florida, Kentucky, Louisiana, Missouri dhe Oklahoma, ku disa prej tyre tashmë kanë ndërmarrë ose po shqyrtojnë ndalimin e fluoridit.
Vetëm në Florida, e cila tashmë ka ndaluar përdorimin e fluoridit në sistemet publike të ujit, pritet që mbi 52 mijë fëmijë më shumë të kenë nevojë për trajtim dentar.
Ekspertët theksojnë se fluoridi luan rol kyç në mbrojtjen e dhëmbëve, duke forcuar smaltin dhe duke e bërë më të vështirë dëmtimin nga bakteret.
Sipas Qendrave për Kontrollin dhe Parandalimin e Sëmundjeve (CDC), fluoridimi i ujit ka ulur prishjen e dhëmbëve me rreth 25% ndër vite.
Megjithatë, çështja e përdorimit të fluoridit ka nxitur debat vitet e fundit, për shkak të shqetësimeve për efektet e mundshme shëndetësore. Disa studime kanë sugjeruar lidhje mes ekspozimit të lartë ndaj fluoridit dhe ndikimeve në zhvillimin neurologjik te fëmijët, por ekspertët theksojnë se këto gjetje lidhen kryesisht me nivele shumë më të larta se ato të rekomanduara.
Autoritetet shëndetësore rekomandojnë një nivel prej 0.7 miligram për litër në ujin e pijshëm, duke e konsideruar këtë dozë të sigurt dhe efektive për shëndetin oral.
Ekspertët paralajmërojnë se, përveç kostove financiare, mungesa e fluoridit mund të çojë në përkeqësim të shëndetit dentar, veçanërisht tek fëmijët që nuk kanë qasje të rregullt në kujdes stomatologjik. Në raste të tilla, familjet shpesh detyrohen të kërkojnë ndihmë në urgjencë, që konsiderohet mënyra më e kushtueshme dhe më pak efektive për trajtim.