Një studim i publikuar së fundmi sugjeron se gratë që i nënshtrohen histerektomisë (heqjes së mitrës) dhe ooforektomisë bilaterale (heqjes së të dy vezoreve) mund të kenë një rrezik më të lartë për të pësuar goditje në tru, krahasuar me ato që nuk i kanë kryer këto ndërhyrje kirurgjikale.
Hulumtimi, i publikuar në revistën Menopause, është bazuar në të dhënat e 21 mijë grave nga studimi kombëtar amerikan NHANES, me një ndjekje mesatare prej mbi tetë vitesh.
Gjatë kësaj periudhe u dokumentuan 193 vdekje të lidhura me goditje në tru. Analiza tregoi se rreziku i goditjes ishte më i lartë tek gratë që kishin kryer histerektomi me ooforektomi bilaterale, ndërsa nuk u pa një rrezik i tillë për histerektominë e vetme apo kur ishte hequr vetëm një vezore.
Një analizë e kombinuar me studime të tjera tregoi se histerektomia me ooforektomi bilaterale lidhet me 18% rritje të rrezikut për goditje në tru, ndërsa histerektomia e vetme lidhet me rreth 5% rrezik më të lartë.
Ekspertët theksojnë se rolin kryesor e kanë nivelet e estrogjenit, të cilat bien ndjeshëm pas këtyre ndërhyrjeve. Kjo ndikon në hyrjen më të hershme në menopauzë, duke rritur rrezikun për sëmundje kardiovaskulare, përfshirë goditjen në tru.
Sipas Dr. Stephanie Faubion nga The Menopause Society, rezultatet nënvizojnë se këto ndërhyrje të zakonshme kirurgjikale, përveç përfitimeve të tyre, mbartin edhe rreziqe afatgjata. “Kjo duhet të shërbejë si një thirrje për të vlerësuar me kujdes rreziqet kardiovaskulare dhe për të zbatuar strategji parandaluese tek gratë që i nënshtrohen këtyre operacioneve,” tha ajo.
Autorët e studimit rekomandojnë që kërkime të tjera me mostra më të mëdha dhe periudha më të gjata ndjekjeje janë të nevojshme për të kuptuar më saktë ndikimin e moshës, teknikave kirurgjikale dhe gjendjes së menopauzës në lidhjen mes këtyre operacioneve dhe rrezikut për goditje në tru./Gazeta Shneta/