Një studim i gjerë nga projekti spanjoll INMA ka analizuar ndikimin që ka mbajtja e kafshëve shtëpiake gjatë fëmijërisë së hershme në mirëqenien emocionale dhe sjellore të fëmijëve.
Hulumtimi përfshiu 1,893 familje nga katër rajone të Spanjës dhe doli me rezultate interesante.
Sipas të dhënave, lloji i kafshës dhe mosha në të cilën fëmija jeton me të mund të influencojnë mënyrën se si ai zhvillon aftësitë emocionale deri në moshën 7–8 vjeç, shkruan MedicalXpress, përcjell Gazeta Shneta.
Studiuesit zbuluan se fëmijët që jetuan vazhdimisht me të ashtuquajturat “kafshë të tjera” – si peshq, breshka, hamstra apo zvarranikë – kishin më pak probleme emocionale në moshën 7–8 vjeç. Këto kafshë me pak kërkesa sipas ekspertëve mund të krijojnë një rutinë të qëndrueshme që ndihmon në zhvillimin e përgjegjësisë, empatisë dhe vetëkontrollit tek fëmijët.
Nga ana tjetër, fëmijët që kishin mace vetëm në moshën 4–5 vjeç kishin një lidhje të lehtë me më shumë shenja ankthi apo probleme sjellore. Megjithatë, studiuesit theksojnë se ky rezultat duhet interpretuar me kujdes, pasi faktorë të tjerë – si profili i familjes, mënyra e rritjes apo lidhja emocionale me kafshën – mund të ndikojnë.
Studimi nuk gjeti ndryshime të rëndësishme emocionale apo sjellore tek fëmijët që jetuan me qen apo zogj, dhe as te fëmijët që kishin kafshë shtëpiake në përgjithësi.
Ekspertët thonë se rezultatet nuk provojnë shkak-pasojë, por tregojnë se kafshët shtëpiake janë pjesë e rëndësishme e mjedisit të fëmijës./Gazeta Shneta/